Сé е по план со електричната марка на Volvo. Фабриката во Кина веќе стартува со производство, заводливото купе со плагин-хибриден погон и голема батерија ќе почне да пристига кај сопствениците уште пред крајот на годинава.
Polestar, марката на Volvo којашто е специјализирана за електричен погон, денес ја отвори својата прва фабрика во Ченгду, Кина. Продукцијата започнува со Polestar 1, престижно купе со каросерија од карбон и со плагин-хибриден погон. Тука ќе се произведува за Кина, којашто е двоен светски шампион, по бројот на продадени автомобили и по бројот на продадени електрични автомобили, за домашниот, но и за извозните пазари. Испораките ќе стартуваат кон крајот на годината.
Polestar 1 со своите системски 600 КС и 1.000 њутнметри вртежен момент е најпрестижното возило со електрифицирана погонска спрега што е произведено во Кина. Квалитетот на производство е како во секоја друга фабрика на Volvo ширум светот, вклучувајќи врвна технологија. Контролата на квалитетот е задача на персонал со 10-годишно искуство токму во тоа подрачје.
Фабриката во Ченгду исполнува со високи стандарди во поглед на одржливоста на животната средина и ефикасноста во работата. Впечатливиот дизајн е дело на архитектонското биро Snohetta. Во комплексот спаѓаат и тест-патека, посебна просторија од којашто се гледа целото производство, како и други содржини за поттикнување на ентузијазмот кај фановите на новата марка на автомобилската сцена.
Планираната годишна продукција за Polestar 1 изнесува 500 возила, односно 1.500 возила за три години, колку што се планира моделот да остане во производство.
Во почетокот на следната година ќе стартува и производството на моделот Polestar 2 во Лукиао, Кина.
https://www.instagram.com/p/B1s4HN0Cebz/