За саемот на потрошувачка електроника во Лас Вегас, BMW подготви посебна изведба на i3, којашто буквално е дневна соба на тркала. За спектаклот да биде вистински, баварците за време на ЦЕС во јануари ќе пуштат низ гардот цел возен парк од i3, преработени исто како саемскиот експонат, кои ќе се повикуваат преку апликација.
Саемот за потрошувачка електроника во Лас Вегас, кусо ЦЕС, веќе со години е едно од ретките места на планетава, кадешто постои некоја временска меѓузона со иднината. На манифестацијата што се одржува меѓу 7-ми и 10-ти јануари 2020, присуствуваат и бројни автомобилски марки, настапувајќи со сериозно осмислени и најчесто сосем невообичаени концепти.
Баварците го подготвија BMW i3 Urban Suite за својот штанд на ЦЕС. Станува збор за различно доживување при возењето, во кабина што е приспособена според личните потреби на патникот во возилото. Од оригиналниот компакт со електричен погон BMW i3 се останати само возачкото седиште и арматурната табла.
Внатрешноста е изведена како бутик хотел, со цел на патникот да му се понуди пријатно чувство, можност да се релаксира, да гледа филм или да се концентрира на работата. Патникот седи во фотелја со потпирач за нозете, а од таванот се спушта голем дисплеј. Озвучувањето е изведено точно за местото на патникот.
Креаторите на овој необичен концепт врз основа на i3 се погрижија и материјалите во кабината да потекнуваат од обновливи извори, па и при изработката се користела „еко-струја“. Повеќето од материјалите се рециклирани, а кожата е омекната со маслиново масло, место со штетна хемија.
Автомобилите не мора да бидат огромни лимузини или СУВ за да понудат луксузно возење денес – тоа е идејата зад овој необичен концепт за ЦЕС
Целата замисла добива уште поголема димензија, затоа што BMW изработи цел возен парк од автомобили исти како i3 Urban Suite. Овие возила ќе бидат понудени на користење во Лас Вегас за време на шоуто, со повикување преку мобилна апликација и можност за превоз до саканото место.
Целта е преку возилото да се укаже на тоа дека возилото не мора да биде големо и од највисоката класа, за да понуди луксузно возење. Од BMW посочуваат дека i3 Urban Suite е само дел од возилата и концептите што се подготвени за Лас Вегас.
https://www.instagram.com/p/B55df8ygesm/