Додека спортската јавност е посветена на Олимпијадата во Сочи, Русите имаат уште еден настан што привлекува внимание. Во Тољати беше одбележан голем производствен рекорд.
Од фабриката на Avtovaz во Тољати во средата излезе 28-милионитиот автомобил под знакот на Lada. Јубилејниот модел е Lada Kalina од новата генерација, со каросерија во металик сино-сива боја и со полна опрема за конкурентска битка: Автоматски менувач, мултимедиски систем, активни системи за безбедност, електрика за прозорците и ретровизорите, централна брава, клима уред, дополнителна звучна изолација и уште многи други ставки што ја дотераа цената на специјалниот модел на 474.600 рубљи, односно близу 10.000 евра.
Комби изведбата на актуелната Kalina стартуваше со продажба во минатиот септември. Комбилимузината и комбито моментно имаат еднакво учество во продажбата на моделот, но тоа ќе се промени откако месецов беше претставена лимузинската изведба на Kalina. Последнава каросериска изведба беше најпродавана во преттходната генерација на рускиот модел.
При одбележувањето на производствениот рекорд шефот Бо Инге Андерсон изјави: „Продажбата на новата Lada Kalina постојано расте. Тоа не е случајност. Платформата што таа ја користи стана едно од најуспешните достигнувања на Avtovaz.“ Моделот моментно е меѓу петте најпродавани автомобили на рускиот пазар, со стартна цена од 6.800 евра. Основниот модел има една воздушна перница, сервоуправување, носачи за багаж на покривот, дневни светла и уште неколку поситни ставки. Производителот редовно ја подобрува Kalina. Во минатиот месец моделот доби подобра звучна изолација и неколку модификации во подвозјето. Во следниот период претстојат освежување на дизајнот и проширување на опремата. Моделот моментно не се нуди на македонскиот пазар.