Volkswagen стартува нова генерација бензински мотори TSI evo

Прв мотор од новата генерација е 1.5 TSI, кој во верзии со 130 и 150 КС ќе започне да се вградува кон крајот на годинава. Моторот работи според милеров циклус, штеди гориво и воведува една премиера.

Volkswagen за првпат во бензински мотор од големосериското производство применува турбина со променлива геометрија во новиот 1.5 TSI evo. Заедно со примената на „милеровиот“ циклус, тоа се главните карактеристики на новата генерација мотори EA211 TSI evo, којашто германскиот концерн ја прикажа премиерно на собирот на најдобрите инженери за мотори во Виена. Бензинецот од 1,5 литар е прв од новата генерација и кон крајот на годинава ќе започне да се вградува во моделите од концернот, во верзии со 130 и 150 КС.

Благодарение на променливата геометрија на лопатките на турбината, 1.5 TSI evo го постигнува максималниот вртежен момент мошне рано, уште при 1.300 вртежи, задржувајќи ја вредноста на максимум во речиси целото работно подрачје на моторот. Според Volkswagen, новиот 1,5-литарски бензинец заштедува до еден литар гориво во споредба со 1.4 TSI.

Како што укажува и додавката „evo“, новиот мотор е еволуција на актуелната фамилија мотори TSI на Volkswagen, којашто низ годините беше надградувана со двојно турбонатполнење, интеркулери, интегрирана издувна гранка заради подобра термодинамика, па дури и исклучување на дел од цилиндрите при умерено оптоварување. Последниот чекор напред со EA211 TSI evo е всушност пресликување на технологијата од новиот 2.0 TFSI од Audi A4, во една „класа“ подолу.

Десет проценти намалена потрошувачка во „реални услови на возење“

Во споредба со актуелниот 1.4 TSI со 125 КС, новиот бензинец постигнува за 10 проценти подобрена ефикасност. Како што наведува Volkswagen, оваа вредност ќе може да се постигне во реални услови на возење, а не само на пробни валци. Досега производителите масовно мамеа и при развојот на новите мотори воведуваа мери што само фиктивно носеа намалување во потрошувачката на гориво, за со релативно мали трошоци да се задоволат строгите норми за издувни гасови – во лабараторија. Во меѓувреме, измамата е разоткриена и приказната е друга.

Постојат реални основи да се очекува подобрена штедливост: Милеров процес на согорување со висок степен на компресија од 12,5:1, турбокомпресор со променлива геометрија на лопатките, впрскување со заеднички вод под притисок до 350 бари, иновативен термоменаџмент, исклучување на цилиндрите при ниско оптоварување и цилиндерски кошулки обложени со плазма.

Последново е технологија што Volkswagen ја води како постапка APS, односно „атмосферско прскање на плазма“ и се однесува на примена на ситнозрнест прашок за прскање, кој во комбинација со „хонување“ на кошулките, создава тенки канали во истите. Во овие канали „изгребани“ од прашокот се насобира моторното масло, а тоа го олеснува лизгањето на клипните прстени, односно го намалува триењето.

Друга предност е подобреното одведување на топлината, со што се зголемува отпорноста на самодетонација на горивото при согорувањето, како и подобата отпорност на корозија во регионите во светот кадешто се точат лоши горива. Технологијата APS има предности и во изведба на хибриден погон, кадешто моторот обично се вклучува при повисоко оптоварување. Очигледно е дека 1.5 TSI е оптимиран токму со оваа цел, за проширувањето на понудата од хибридни модели во Volkswagen. Оваа технологија засега ќе ја користи само посилната верзија на 1.5 TSI со 150 КС.

Исклучувањето на цилиндрите е уште еден фактор за штедливоста

Главата на моторот исто така е оптимирана заради подобрено одведување на топлината, но главните промени сепак се извршени во аголот на вентилите и во формата на комората за согорување, заради воведување на милеровиот циклус. Во споредба со постоечкиот EA211, хидрауликата за приспособување на фазата на брегастото вратило за вшмукувачките вентили реагира побрзо, односно постигнува брзина до 300 степени на коленастото вратило во секунда, заради подобра контрола на впрскувањето на горивото. Во штедењето гориво учествува и исклучувањето на вториот и третиот цилиндар, при ниско или делумно оптоварување на моторот.

Контролата на системот за ладење на моторот сега може да дозволи целата течност во моторот да мирува додека моторот ја достигне работната температура, од што покрај намаленото абење на моторот во фазата на загревање профитира и побрзото греење на кабината. Оваа интелигенција на системот за ладење е активна во целото работно подрачје и се управува преку самата контролна електронска единица на моторот. Во намалувањето на триењето кај TSI evo се надоврзува и варијабилна пумпа за масло, слој од полимер за првото главно лежиште на коленастото вратило, како и примена на нисковискозно масло од класата 0W-20.

Голем удел во заштедата се постигнува преку високата компресија, раното затворање на вшмукувачките вентили, брзото ширење на пламенот и примената на ефикасно турбонатполнење. За последново, Volkswagen користи турбина со променлива геометрија на лопатките со електрична контрола, како светска премиера кај големосериските бензински мотори. Новиот 1.5 TSI evo постигнува скок на максималниот вртежен момент за 35 проценти побрзо во споредба со 1.4 TSI со 125 КС. Во впрскувањето за првпат се користи систем од четвртата генерација, со притисок зголемен на 350 бари. Тоа води кон намалување на капките гориво во смешата за согорување, односно до значително намалување на емисијата на цврсти честички.

Прв модел што ќе го добие новиот мотор ќе биде Volkswagen Golf, по фејслифтот кој претстои наесен, а испораката на моделските изведби со новиот мотор ќе стартува неколку месеци подоцна.

Основни технички податоци на мотор EA211 1.5 TSI evo со 130 КС