Дарко Јаконов
За неколку години гумите на нашите автомобили ќе растат на ливада – барем што се однесува до нивните најважни состојки. Се гради фабрика што ќе произведува каучук добиен од глуварче.
Индустриското производство на глуварчиња како суровина за автомобилски гуми е пред историска пресвртница. Производителот на гуми Continental и Институтот Фраунхофер од германскиот град Ахен веќе со години вршат истражувања на ова поле. Деновиве стартуваше изградба на фабрика во близина на градот Минстер, каде што во поголем обем ќе се произведува природен каучук.
Првите тестирања со гуми што содржат каучук од глуварче ќе стартуваат за само неколку години. Природниот каучук досега се добиваше од сокот од каучуково дрво, кој од супстропските подрачја мора да мине долги патишта додека пристигне во фабриките за производство на автомобилски гуми. Наспроти тоа, глуварчето расте во многу поширок климатски регион, па со тоа и добивањето каучук од него е значително поевтино. Поради тоа што глуварчето не бара посебни услови на одгледување, се отвораат големи потенцијали за негово култивирање на неискористените полиња.
