Невозможниот спој на двата производитела што ги направија најрасипливите автомобили во историјата веќе ги покажува ефектите: Jeep Renegade мора во сервис, поради откачување на безбедносните ремени.
Додека браншата работи на автомобили што управуваат самостојно, без „асистенција“ од возачот и во возилата се вградуваат камери, радари, ласери и сензори за постигнување уште поголема безбедност, двата невозможни партнера Fiat и Chrysler имаат проблеми со најобични безбедносни ремени. Кога беше објавено итало-американското партнерство на двата концерна што ги имаат произведено најрасипливите автомобили воопшто во автомобилската историја, вицевите околу квалитетот на заедничката работа на Fiat и Chrysler долго време беа главна тема во браншата.
Но, сопствениците на Jeep Renegade немаат причина за смеење. Среќна околност е единствено тоа што продажбата на моделот е толку мизерна, па во сервис мора да се повикаат само 1.913 примероци од квази-теренецот со големото име на Jeep и малата техника на Fiat. Станува збор за возила произведени во периодот меѓу 6-ти октомври лани и 21-ви јануари 2015, кај коишто постои опасност бравата на безбедносните ремени да се откачи при судир. Неверојатно, суштинската заштита во еден автомобил не функцонира во Fiat-Chrysler! Како е тогаш со другите системи?
Renegade не е единствен што мора да оди во сервис. Проблеми со безбедноста има и Cherokee. Каблите што минуваат низ кошот на моторот може да паднат од лежиштата и да дојдат во допир со лостовите на менувачот, од коишто може да се скине заштитната обвивка на каблите и да се случи заземјување со разни струјни кругови, вклучувајќи го и CAN-Bus. Неговиот контролен уред во тој случај може да ги исклучи безбедносните системи во возилото.
