Дарко Јаконов
По повод 22-ри мај, светскиот ден на биолошката разновидност, Porsche потсетува дека одржливоста и животната средина се теми на коишто во спортската марка се придава голема важност. Неколку изненадувачки факти за фабриката во Лајпцих.
Исто како што тоа важи за целата бранша, па и многу пошироко, Porsche работи на визија за „Zero Impact Factory“. Покрај тоа што Porsche веќе солидно се има пуштено по лентата на електромобилноста со своjот Taycan, како и со идниот електричен Macan, обврска на браншата е производството на возилата да се изведува без какво било нарушување на животната средина.
Откако е изградена фабриката во Лајпцих во 2000 година, Porsche работи постојано на проекти за задржување на разновидноста на биолошките видови на просторот на фабриката.
На полигонот за теренско возење, што е дел од самата фабрика, покрај ретка сорта бикови (тур) и ексмурски пони, живеат најразновидни диви животни во природни услови. Во изминативе повеќе од 20 години, Porsche има изведено бројни моклишта (влажни подрачја) и пасишта, со цел да се обезбедат природни услови за животните и за растенијата.
Површините под цветни ливади околу фабриката опфаќаат вкупно 12.600 метри квадратни. Инсектите се важни за одржување на екосистемот, а еден податок верно отсликува што подразбираат под „важно“ во марката на 911, Cayenne и Boxster: Tри милиони медоносни пчели се регистирани на просторот.
Во соработка со регионалните пчелари, Porsche уште од 2017 година произведува сопствен мед, којшто е достапен во продажба под името Turbienchen.
Од 2018 година, во оваа природна средина доаѓаат семејства со дечиња на Porsche Safari.
