Дарко Јаконов
Семејниот ван на Шпанците ја одушеви редакцијата на водечкиот европски магазин за автомобили. Alhambra без ниту еден дефект мина 100.000 километри. Следат уште 100.000.
Под наслов „патувачкиот џин“, магазинот Auto Bild го објави билансот од првите 100.000 километри со големиот ван што редакцијата го презеде на супертест пред две години. Во моделската изведба со дизел со 170 КС, менувач со двојна спојка, автоматска клима, седум седишта и електромотори за страничните врати и задниот капак, Alhambra 2.0 TDI Ecomotive Style мораше само еднаш да го посети сервисот непланирано, и тоа поради пукнат ветробран од удар од камен.
При редовното сервисирање на 78.153 километри се покажа и потреба од коригирање на светлосниот сноп на предните светла, што овластениот сервис на Seat во Германија го изврши во рамките на гаранцискиот рок, односно без надомест. Следното што беше заменето на ванот за големите семејства се предните сопирачки дискови и облоги, на 89.486 километри. Alhambra останува на тест во Auto Bild до 200.000 километри.
