Тестирањето на прототипите од новата генерација на Porsche 911 заврши. Останува уште полирање на каросеријата и подготовка за стартот на продажбата во почетокот на следната година.
Осмата генерација на спортскиот класичар Porsche 911 ќе стартува со продажба во почетокот на следната година. Во моментов прототипите јурат под полна гас и ја комплетираат тест-програмата којашто се одвиваше глобално. Новиот спортски автомобил мина тестирање во екстремни климатски зони, со температурна разлика од 85 степени Целсиузови, совлада висинска разлика од преку четири километри, го издржа измачувањето во најгустите градски застои, а верно на неговиот карактер, не пропушти да постигне рекордни времиња на неколку тркачки патеки. Porsche мора да обезбеди дека спортската икона ќе функционира беспрекорно и по многу години.
Главното внимание при тестирањето беше ставено на класичните вредности на Porsche, како што се динамичните својства на подвозјето и перформансите на моторот. Како што ветуваат инженерите, новата генерација на Porsche 911 уште повешто ќе ги спојува двете крајности, односно возењето во секојдневен сообраќај и возењето во екстремни услови на тркачка патека.
Останува само незначително маскирање на конечниот изглед на новиот Porsche 911 до официјалната премиера
Се проверуваше и функционирањето на комплетно новиот концепт на ракување, вклучувајќи сосем нови дисплеи и инструменти. Истото важи и за многубројните системи за асистенција, како и за можностите за вмрежување и за користење мобилни услуги. Особено е важно да се провери ракувањето и работата на Porsche Connect, затоа што спортската марка се продава во многу земји низ светот и мора да се обезбеди дека функциите на конективноста ќе работат примерно насекаде.
Во услови на екстремна жега на Средниот Исток или во Долината на смртта во САД се проверуваше работата на климатизацијата при температури од 50 степени Целзиусови, но исто така и на ладењето на моторот и воопшто на неговата работа. При високи температури не смее да се дозволи деловите во кабината да произведуваат непријатни звуци од гмечењето коешто би се појавило кога одделните делови се шират под дејство на високата топлина.
Финска е ветената земја за тестирање прототипи, заради единствените можности за фино дотерување на системите за регулирање на динамиката · Новиот Porsche 911 таму мина илјадници километри
Секако дека мора да се тестира и во спротивниот екстрем, на 35 степени Целзиусови под нулата, во Финска. Во тие услови мора да се обезбеди дека моторот ќе стартува лесно, исто како што треба да се обезбеди и моќно греење и одведување на влагата од кабината и спречување на кондензација на стаклата. Уште е поважно како ќе се покажат тракцијата, возните својства, сопирачките, како и брзината со којашто реагираат системите за регулирање на возната динамика.
Кривулестите патишта во Поларниот круг нудат одлични услови за тестирање на спортските автомобили. Новиот Porsche 911 извозе и маратон по кинеските патишта и во сообраќајните услови што се специфични за регионот. Исто така мораше да се провери и како моторот ќе работи со најразлични квалитети на гориво.
Германскиот Нирбургринг е традиционален дел од тесстирањето на секој модел на Porsche. Моторот, менувачот, сопирачките и подвозјето мора да го издржат долготрајното изложување на екстремно напрегање на тркачката патека. Во Италија се возеше на Нардо, познатата патека којашто овозможува постигнување највисоки брзини, но и тестирање на ладењето на моторот и на управливоста на возилото.
Најниската точка на тестирањето беше во Долината на смртта, на 90 метри под висината на морето, додека највисока точка беше на 4.300 метри надморска висина, на планината Еванс во Колорадо. Реткиот воздух на голема висина е вистински предизвик за битурбо-натполнењето и за системот за напојување со гориво. На крајот на тестирањето, сите прототипи заедно совладаа пат од околу три милиони километри ширум планетата.
Porsche 911 GT2 RS MR го извозе Нирбургринг за рекордно време
Златното Porsche му вреди 2,7 милиони евра на новиот газда
Porsche започна со изградба на седмиот центар за возачки тренинг
Рекорд на Porsche 911 GT2 RS на Нирбургринг
20,8 километри и 73 свијоци за 6 минути и 40 секунди. Нов рекорд на Porsche 911 GT2 RS на Нирбургринг, за автомобил што (се' уште) смее да носи регистерски таблици. Следно од Porsche ќе биде рекорд на рекорди?
Posted by Automedia.mk on Saturday, November 3, 2018