Northvolt, шведски производител на литиум-јон батерии и партнер на Volkswagen и BMW, обезбеди три милијарди долари за фабрики во Шведска и во Германија.
Шведскиот производител на батерии Northvolt обезбеди кредити во висина од 1,6 милијарда американски долари (1,36 милијарда евра), неопходни за масовното производство на батерии во своите идни фабрики. Кредитори се банки, пензионерски фондови и финансиски инситуции, вклучувајќи ја и Европската Инвестициска Банка, којашто учествува со 350 милиони долари.
Производителот на литиумски батерии преку кредити и продажба на акции обезбеди вкупно три милијарди долари. Со овие средства ќе се градат двете големи фабрики, во германскиот Залцгитер и во Скелефтеа, на северот на Шведска. Партнерот на Volkswagen и BMW ќе користи дел од овие средства за истражување и развој.
Northvolt во 2024 година ќе стартува со испорака на батериски ќелии во вредност од две милијарди евра за баварскиот производител на автомобили BMW. Овие батерии ќе се изработуваат во фабриката во Скелефтеа, којашто е во изградба. BMW сам ги монтира батериите за своите електрични автомобили, но одделните модули ги набавува од партнерите.
Шведската компанија соработува и со Volkswagen, во изградбата на фабрика во Залцгитер. Наспроти погоните во Скелефтеа, кои стартуваат со работа во 2021 година, германската фабрика ќе започне со производство во 2024 година.