Дарко Јаконов
Ford Focus како штотуку да се разигрува. Откако германскиот компакт поттикна веројатно рекорден број пробни возења по пристигањето на нашиот пазар, сега следи една верзија на моделот којашто е многу далеку од компактна: Класичната и за нашиот пазар традиционална лимузина со 4 врати, но и со багажник од 536 литри близу и 4,7 метри меѓу браниците
Ford Focus дефинитивно ја ужива најголемата слава од неговото прво појавување како моделско име и како наследник на Escort пред дваесет години. По претставувањето на комбилимузинската изведба и на комбито Touring, со нивните осум мотори и седум нивоа на опрема, следеше кросовер изведбата Active, со 30 милиметри екстра растојание од подлогата и со стилски елементи на теренец. Во меѓувреме се случи и титула на автомобил на годината во блиската Хрватска. Сега пристига и лимузината, којашто традиционалните купувачи на Ford и оние кои со насмевка се присетуваат на првиот Orion, ја преферираат наспроти комбилимузината.
Мида Гранд Моторс веќе стартуваше со продажба на лимузината, која чини 500 евра повеќе од изведбата со пет врати. Покрај должината од 4,65 метри е смешно Ford Focus да се води како „помалиот брат на Mondeo“, кој додава уште 22 сантиметри од еден до друг браник, но затоа може да се каже дека е најдолгиот Focus досега.
Багажникот и фактички е длабок еден метар, поточно 1.068 милиметри
Тие 27 сантиметри дополнителна должина во споредба со изведбата со 5 врати се додадени во задниот дел. Соодветно на тоа и багажникот располага со 536 литри или дури 161 литар повеќе од комбилимузината. Тоа што багажникот буквално изгледа како да нема крај, се потврдува и со мерките. Длабочината на багажникот кај лимузината изнесува 1.068 милиметри, наспроти 844 милиметри кај стандардниот Focus. Просторноста на задната клупа е идентична, како во ширината на кабината, така и во висината на просторот за глава.
Понудата од мотори е иста, со таа разлика што верзијата 1.5 EcoBoost со 182 КС останува резевирана за комбилимузината и за Touring. Подобрата аеродинамичност на каросеријата, поради продолжениот опаш, влијае позитивно и врз перформансите и врз потрошувачката на гориво.
Подобрата аеродинамичност обезбедува повисока крајна брзина и пониска потрошувачка во споредба со изведбагта со 5 врати
Според фабричките податоци, изведбата со мотор EcoBoost со 100 КС, постигнува крајна брзина од 189 km/h или за 3 km/h повеќе од комбилимузината. Спринтот до темпо сто не се разликува (12,1 s), исто како и меѓузабрзувањето од 50 до 100 km/h во четвртиот степен (12,0 s). Во потрошувачката на гориво, лимузината е за два децилитри поштедлива (просек 4,7 наспроти 4,9 L/100 km).
Разлика во тежината практично не постои. Седанот без патници и багаж тежи 1.326 килограми или само четири килограми повеќе од „кусиот“ Focus. Вообичаено за лимузина со продолжен опаш во компакт класата, дозволената носивост е малку пониска во споредба со верзијата со 5 врати.
Најдостапната изведба со еднолитарски EcoBoost со 100 КС чини 18.900 евра според македонскиот ценовник. Спортското ниво на опрема ST-Line е недостапно за „благородничката“ каросериска форма, исто како и ексклузивното ниво Vignale.
Како следна фаза се очекува првиот експлозивен степен од одделението Ford Performance, во форма на Focus ST со 250 КС, пред круната на целата гама, RS. Но, поверојатно е дека во меѓувреме ќе се случи уште некое изненадување. Можеби изведба со хибриден погон. Салонот во Женева е веќе во март.
Хибриден Mondeo во салонот на Ford во Скопје
Ford Transit доби нов бројач по 999.999 километри
Shelby GT500 е Супермустанг: Најбрзиот сериски Ford во историјата
Ford Focus со одличен старт: Повеќе од 40.000 продажби за 6 месеци
Комплетен водич за новиот Ford Focus: Цени, опрема, мотори, перформанси
