Дарко Јаконов
Shelby GT500 е најекстремната изведба на Ford Mustang, со преку 700 КС. Досега немало сериски модел под знакот на синиот овал што имал повеќе коњски сили од тоа. Премиерата е на салонот во Детроит
Ford Mustang веќе има една „отровна“ изведба, Shelby GT350. Отровна, затоа што кобра е заштитниот знак на Shelby. На салонот во Детроит пристигна верзијата на Ford Mustang со уште една доза отровно полнење, Shelby GT500. Соодветно на моќноста од 709 КС, коишто ги ослободува рачно склопениот V8 од 5,2 литри, GT500 не пропушта однадвор да покаже дека се работи за најсилната сериска изведба на база на Mustang досега, и воедно за најсилниот сериски Ford на сите времиња.
Предниот браник уште толку има добиено на агресивност, а кобрата на Shelby во дводелната маска е толку впечатлива што побудува почит кај останатите возачи. Подеднакво е впечатлив и големиот отвор за воздух во хаубата, со решетка што се отстранува, за на тој начин да се постигне совршен доток на воздух. Долу на браникот се забележуваат додатоци за оптимирање на аеродинамичноста.
Бандажите стандардно поседуваат дијаметар од 20 инчи, единствено може да се доплати тие да бидат изработени од карбон. Нормално е тоа што GT500 поседува и уште помасивен спојлер назад. Освен со големината и формата, задниот дифузор се разликува по тоа што е изработен од композити.
Shelby GT500 е класичен тјунинг, но од врвните мајстори на својот занает
Место класични инструменти, возачот добива дигитален дисплеј од 12 инчи. Тркачките школки од Recaro се вградуваат како опција, и верно на името, го држат возачот на место дури и при екстремните странични забрзувања што е пособно да ги издржи подвозјето. Во арматурната табла се забележуваат делови од карбон.
„Кобрата“ не отсуствува и во кабината, кадешто се среќава на повеќе места, вклучувајќи ги седиштата и средината на воланот. Со повеќето функции на возилото се ракува преку дисплејот од осум инчи на допир. Освен од моторот и гумите, музиката може да пристига и од врвното озвучување, коешто носи лого на Bang & Olufsen.
Развојот на Shelby GT500 е дело на инженерите на Ford Performance, коишто располагаат со безценети искуства во мотоспортот. Тоа беше и идејата, кога се формираше ова одделение, коешто е пандан на M GmbH или AMG. Моторот V8 со зафатнина од 5,2 литри и со механички компресор поседува блок и глава од алуминиумска легура и се склопува рачно.
Во комбинација со седумстепен менувач со двојна спојка, Супермустангот минува четвртина милја за помалку од единаесет секунди. Ford не објавува други перформанси, и тоа е сосем нормално, затоа што во кругот на возачи и фанови на GT500, времето на 400 и кусур метри важи како единствен репер. Но, не е тешко да се претпостави дека класичниот спринт би траел осетно под четири секунди.
За моќност од преку 700 КС на Shelby GT500 се потребни и соодветни сопирачки со двојно повеќе „моќност“
Возачите кои имале искуство со вакви моќници, знаат какво е чувството кога мора да се сопира силно од темпо 250. Затоа е подеднакво важно тоа што Shelby GT500 поседува и масивни сопирачки дискови и сопирачки клешти од специјалистот Brembo. Уште пред премиерата, Ford посочи дека дел од компонентите во сопирачките на GT500 се изработуваат со технологија на 3D-печат.
Испораките во САД ќе стартуваат наесен. Екстремниот Mustang за жал нема да биде достапен во официјалната продажна мрежа на Ford во Европа, но затоа има шанси по мошне „солена цена“ да се обезбеди примерок од специјализираните компании за увоз на возила од преку океанот.
Ford Focus со одличен старт: Повеќе од 40.000 продажби за 6 месеци
Ford Focus е автомобил на годината во Хрватска
Ford напредува на германскиот пазар повеќе од VW и BMW
Добриот стар Ford Focus, ама нов
Комплетен водич за новиот Ford Focus: Цени, опрема, мотори, перформанси
