Во Италија, втор најголем пазар за марката по Бразил, Гранде Панда ќе биде достапна во изведба со 1,2-литарски бензинец со 48-волтен благ хибриден погон со 100 КС и со цена од 20.400 евра. Тоа е 150 евра под слично опремен Ц3, според италијанските ценовници.
Ситроен Ц3 сепак се нуди и во класична изведба без благ хибриден погон, со цена од 15.240 евра во Италија. Гранде Панда засега нема да биде достапна во таква погонска изведба, меѓутоа во понудата се наоѓа и изведба со благ хибриден погон со основно ниво на опрема и со цена од 18.900 евра во Италија.
Електричната изведба на Гранде Панда исто така со цената е позиционирана под електричниот Ц3, со слична опременост. Гранде Панда во традиционалната серија РЕД почнува од 24.900 евра, додека серијата е-Ц3 Ју пак Плус чини 26.400 евра. Ситроен нуди и основен модел со електричен погон за 23.900 евра, а наскоро доаѓа и изведба со помала батерија и соодветно покус досег, но и цена што ќе биде под 20.000 евра. Сите цени во објавата важат за италијанскиот пазар.
Двата модели на Фиат и Ситроен делат иста платформа за електричен погон, со електромотор со 113 КС и батерија од 44 кВч, со деклариран досег од 320 километри.
Продажбата на Гранде Панда почнува во март.
Двата модели на Фиат и Ситроен заеднички ја делат платформата Смарт Кар на концернот Стелантис, којашто е развиена за глобалниот пазар и постигнува значително пониски трошоци преку скалестиот ефект што се постигнува на тој начин. Гранде Панда се произведува во Србија, додека Ц3 доаѓа од Словачка.
Електричната Гранде Панда се натпреварува со Ситроен, Рено, Липмотор
Гранде Панда ќе биде меѓу најдостапните малечки електрични модели во Европа. Покрај е-Ц3, конкуренцијата ги вклучува новиот Рено 5, којшто почнува од 25.000 евра, но и Липмотор Т03 од концернот Стелантис, чијашто цена во моментов изнесува 16.000 евра, вклучувајќи ја субвенцијата од страна на кинескиот производител.
Гранде Панда со стандарден погон ќе се соочи со пожестока конкуренција, којашто ги вклучува Дачиа Сандеро, најпродаваниот модел во Европа во 2024 година, со ценовник што почнува под 13.000 евра. Меѓу останатите новаци се новата генерација на Сузуки Свифт, со цени што почнуваат малку над 17.000 евра, како и кинескиот МГ 3, што се нуди за помалку од 20.000 евра.
Концернот Фолксваген ги има Поло, Шкода Фабиа и Сеат Ибица, сите со цени што почнуваат малку над 20.000 евра. Меѓу останатите модели од концернот Стелантис се наоѓаат Пежо 208 и Опел Корса, со цена над 21.000 евра. Тојота ја нуди основната изведба на Јарис по цена малку над 20.000 евра.
Дачиа и Рено ја предводат продажбата во сегментот на малечките автомобили
Фиат со децении се бореше против Рено и Пежо за освојување на врвот во продажбата на малечки автомобили во Европа. Откако италијанскиот производител во 2013 година престана со производство на бестселерот Пунто/Гранде Пунто, Фиат по кусо време исчезна од врвот на тоа што во моментов е трет најпродаван сегмент на европскиот пазар.
Најпродаван автомобил воопшто на европскиот пазар лани беше Дачиа Сандеро, со продадени 270.558 возила. Втор беше Клио со 216.756 продажби, пред Пежо 208 со 199.898 возила, покажуваат податоците од Датафорс.
Фиат лани се врати во сегментот на градските автомобили со новиот 600 со каросерија на кросовер. Со продадени 2.400 примероци во декември, тој сега е втор најпродаван Фиат во Европа, по Панда. Трет е електричниот 500, со 1.542 примероци. Тој наскоро доаѓа и во изведба со благ хибриден погон, што значително ќе го засили присуството на италијанската марка на сцената.
Фиат 600 почна да се продава кон завршетокот на минатата година и од вкупно 26.214 продадени примероци за неколку месеци, 8.491 се чисто електрични.
Името Гранде Панда е избрано за новиот модел да се разликува од традиционалната Панда, којашто ужива популарност без престан. Лани таа беше најпродаван мини-автомобил во Европа, со 120.135 примероци.
Гранде Панда се одликува со бројни посебности, вклучувајќи го спиралниот кабел за полнење што се извлекува од предната маска, без потреба кабел да се вади од багажник и да се поврзува прво со полнач, па со возилото. Полнењето под моќност од 7 кВ до 80 проценти трае околу четири и пол часови.
