По шестнеделното мирување заради подготовка за производство на електричниот BMW i4, фабриката во Минхен продолжува со работа. Пет илјади вработени се вратија на своите работни места. На иста лента во фабриката отсега ќе се произведуваат модели со бензински, дизел, хибриден и електричен погон.
Двесте милиони евра беа вложени во подготовката на фабриката во Минхен за производство на електричниот модел BMW i4. Во матичната фабрика на Баварците, уште во периодот меѓу 2015 и 2018 година беа вложени 700 милиони евра, вклучувајќи нова еколошка лакирница и проширување на каросериското одделение, пред почетокот на сериското производство на новата серија 3.
Предизвик во преструктурирањето беше работењето во тесен простор. Во такви услови мораше да се отстранат досегашните постројки, да се вградат новите и да се пуштат во работа. За таа цел, технолошките експерти уште при планирањето користеа дигитални алатки и симулација на производството во услови на виртуелна реалност. Вработени во фабриката носеа очила за виртуелна реалност и ги симулираа своите работни чекори, со цел да се провери ергономијата.
Најголемиот дел од новите производствени процеси што се потребни за BMW i4 можат да се реализираат со постоечките постројки. Дополнителни постројки беа неопходни само за подната група и за задниот дел од каросеријата на BMW i4, што се разликуваат од стандардните модели поради електричниот погон и батеријата. За вградување на батеријата од 550 килограми се користи целосно автоматска монтажа.
Фабриката во исто време се подготвуваше и за производство на новиот BMW M3, што ќе се произведува на истата лента со i4. Фабриката што влече корени уште од 1922 година, отсега ќе ги произведува електричниот BMW i4, лимузинската и Touring-изведбата од Серијата 3, со класични мотори и со хибриден погон, како и спортскиот M3.