Последиците од кризата секако дека се чувствуваат и во продажбата на Audi. Но, во меѓувреме пристигаат многу оптимистички вести. Лимузинската изведба на Audi A6 неочекувано се најде меѓу најпродаваните модели на марката од баварскиот Инголштат.
Колку што има причини за загриженост, толку има и повод за голем оптимизам. Така може кусо да се опише моменталното расположение во Audi, во премиум марката на концернот од Волфсбург. Додека волуменските марки неретко бележат преполовување на продажбата, падот кај Audi е далеку помал. Марката со четирите прстени го заврши второто тромесечје со загуба од близу 700 милиони евра. Но, од друга страна е тука Porsche, кој во истиот период постигнал заработка од 600 милиони евра. Во истиот период лани, заработката била двојно поголема. На крај, минусот во касата на концернот Volkswagen нема да биде толку голем како кај останатите производители.
Добра вест од Audi е тоа што од септември повторно ќе се работи во полна смена во германските фабрики во Инголштат и Некарсулм. Во минативе неколку седмици, во фабриките е вратен голем дел од персоналот. Менаџментот сепак се соочува со голема неизвесност, дали повторно ќе следи намалување на продажбата на возила, како последица од евентуалниот втор корона-бран.
Продажбата на Audi A6 во првите шест месеци се зголемула за 26% во споредба со лани
Во секоја криза има и херои. Audi A6 е неочекуваниот херој во продажбата на марката. Во првото полугодие, таа се зголемила за 26 проценти во споредба со првите шест месеци лани. Падот во продажбата, со 22 проценти, се поднесува многу полесно отколку падовите на конкурентските марки, кои се повеќе од двојно поголеми.
Со точно 95.133 испораки, лимузинската изведба на Audi A6 станала втор најпродаван модел на марката, веднаш по Q5. Тоа значи дека овој бизнис-крстосувач во меѓувреме ги престигнал и класичните бестселери, Audi A3 и Audi A4. Реално, „шестката“ е најпродавана моделска серија, кога ќе се вклучат и бројките од Avant и од Allroad. Практично секој шести продаден автомобил на Audi е од моделот од вишата класа.
Постои добро објаснување за овој феномен на A6. Моделот е достапен со најразлични мотори, во сите категории на моќност. Се нудат и моќни бензинци и моќни дизели, има и верзија со приклучен хибриден погон. Недостига единствено електрична варијанта. Audi веќе има одговор и за тоа, со e-tron и со e-tron Sportback.