Стелантис годинава се враќа на салонот во Париз со нова марка во својата понуда. Тоа е кинескиот Липмотор, којшто ќе одржи премиера на компактниот СУВ-модел Б10 што е наменет за европскиот пазар.
Покрај Липмотор, на салонот ќе учествуваат уште Алфа Ромео, Ситроен и Пежо. Премиум марката на Стелантис, ДС, нема да изложува, исто како останатите европски марки на концернот, меѓу кои се главни Фиат, Опел и Масерати.
Липмотор се придружува во концернот Стелантис како 15-та светска марка, преку заедничката компанија Липмотор Интернационал, каде што Стелантис држи 51 проценти од акциите. Липмотор Интернационал ќе ги продава моделите на кинеската марка надвор од Кина.
Извршниот директор на Стелантис, Карлос Тавареш, и основачот, претседател и извршен директор на Липмотор, Шу Џиангминг, на салонот ќе го претстават Б10. Парискиот салон отвора за публика на 15-ти октомври, откако еден ден претходно новинарите први ќе се запознаат со новитетите.
Покрај Б10, Липмотор ќе ги прикажува и Ц10, којшто е електричен СУВ од средна класа, како и Т03, градски автомобил со електричен погон.
Т03 се произведува во фабриката на Стелантис во Тихи, Полска, каде што се врши монтажа на полуготови модули што се увезуваат од Кина. На тој начин се избегнуваат казнените царини што ЕУ ги одреди за увозот на електрични автомобили од Кина. Тавареш најави можност и други модели на Липмотор да се произведуваат во Европа.
Тавареш на 15-ти октомври ќе одржи воведен говор на автомобилскиот самит што се одржува во Париз, на просторот на Париз Експо.
Стелантис на 25-ти септември најави дека на салонот ќе присуствува со 26 модели од четири марки, вклучувајќи пет светски премиери, меѓу кои и Липмотор Б10, којшто е единствен вистински новитет.
Покрај Липмотор, премиери ќе има и на модели од Алфа Ромео, Ситроен и Пежо.
Алфа Ромео
Алфа Ромео Јуниор Велоче 280ЦВ е најспортската изведба од малечкиот кросовер и првпат се појавува пред јавноста. На штандот ќе биде изложено и моделското 2025 годиште од компактниот СУВ-модел Тонале, најпродаваниот модел на Алфа, со неколку измени, како и 33 Страдале, суперспортски автомобил што ќе се изработи во ограничен број примероци, и нова верзија од лимузината од средна класа Џулиа, Квадрифољо СуперСпорт.
Ситроен
Новите Ц3 и Ц3 Еркрос, комбилимузината и неговата СУВ-изведба, првпат ќе се појават пред пошироката јавност, иако двата модели веќе се достапни за нарачка. Тие се први модели на Ситроен за европскиот пазар, што се конструирани врз платформата Смарт Кар на Стелантис и се понудени и во електрична изведба со достапна цена и во изведба со бензински мотор.
Пежо
Целосно електричната изведба од фастбекот на Пежо ја носи вообичаената ознака е-408 и ќе има премиера на салонот во Париз. Меѓу останатите новитети на Пежо се електричните изведби со продолжен досег од компактниот СУВ-модел е-3008, со досег до 700 километри, и СУВ-седумседот е-5008, со досег до 668 километри.
