Заедничко вложување на шест компании има за цел да го забрза ширењето на погонот на водород во сегментот на товарните возила во Кина. Компанијата со седиште во Пекинг се води како United Fuel Cell System R&D (FCRD).
Покрај корпорацијата Toyota, во новата заедничка компанија учествуваат уште фирмите China FAW, Dongfeng Motor Corporation, Guangzhou Automobile Group, Beijing Automotive Group и Beijing SinoHytec. Јапонскиот пионер во чистите погонски решенија учествува со 65 проценти. Во развојот на водородниот погон за камиони во почетокот ќе работат 50 инженери, а нивниот број потоа ќе се зголеми двојно.
Пазарот за возила со погон со горивни ќелии, особено за товарни возила, расте со огромна брзина во Кина. Целта на заедничката компанија е да се забрза развојот на погонски системи со горивни ќелии до фазата на влегување во сериско производство. Нагласокот се става на развој на издржливи, конкурентни и достапни компоненти и системи.
