На корисниците на Mobility од неодамна им стои на располагање по една Tesla на железничките станици во Берн и Луцерн. Целта е да се докаже дека електричните автомобили се добри за услугата на „carsharing“ и да се направи уште еден чекор во популаризацијата на погонот на струја.
Компанијата Mobility располага со возен парк од 3.120 сопствени автомобили што им ги нуди на располагање на своите корисници во Швајцарија. На тоа се надоврзуваат автомобили од партнерските фирми и од гаражистите, во коишто Mobility ја вградува својата технологија и ги претвора во автомобили за „carsharing“, односно во возила што секој може да ги изнајми на кусо време по цена што е многу подостапна од класичниот рентакар.
Новитет се двете електрични возила Tesla Model 3 што може да се изнајмат на неколку минути или часови и по користењето да се остават на кое било јавно паркиралиште. Возилата се на располагање во Берн и во Луцерн. Од компанијата ценат дека на овој начин ќе им овозможат на луѓето што уште немаат искуство со електричните автомобили, да ги надминат предрасудите или стравовите и да се уверат во функционирањето на возилата на струја.
Mobility претходно обезбеди по една Tesla во Цирих и Базел. Корисниците досега имаат само позитивни искуства
Електричните автомобили на Tesla спаѓаат во поскапата категорија возила за изнајмување, но големиот интерес е доказ дека корисниците ја препознаваат добрата противвредност на понудата. Еден час изнајмување чини 4,00 швајцарски франци (230 денари) и по 0,95 франци по километар (54,40 денари). Останатите 120 електрични автомобили во возниот парк на Mobility се од моделот Renault Zoe, кој се изнајмува за 2,50 франци на час (143 денари) и 0,65 франци по километар (37,22 денари).
Мрежата на Mobility во Швајцарија опфаќа 224.000 кориснички и корисници на 3.120 возила на 1.530 локации. Со автомобилите може да се отпатува до друг град и да се остави таму, без потреба да се враќа на појдовното место.
>>> Будимпешта доби 240 возила BMW и Mini за изнајмување на улица