Дарко Јаконов
Шпанската влада најави пакет за помош вреден милијарди евра за автомобилската индустрија што е силно погодена во корона-кризата.
Шпанските власти најавија пакет за помош во висина од 3,75 милијарди евра за автомобилската индустрија во земјата што силно е погодена од последиците на корона-кризата. Најголемиот дел од помошта ќе биде наменет за субвенционирање на продажбата на електрични автомобили, најави премиерот Педро Санчез. Повеќе детали за мерките ќе бидат објавени во следниот понеделник.
Автоиндустријата е меѓу најважните стопански гранки во Шпанија. Таа учествува со околу десет проценти во бруто домашниот производ и обезбедува околу два милиони работни места.
Санчез ја оцени како критична ситуацијата во којашто се наоѓа автомобилската бранша, поради прекинатото производство во март и април, како и поради намалената продажба. Санчез нагласи дека целта на државната помош е на автомобилската бранша да ѝ се олесни преоѓањето во „одржлива мобилност“.
