Во истражување меѓу 43.000 сопственици на автомобили, што го спроведе британскиот магазин Which?, најмногу поплаки од клиентите имало за Range Rover Velar. Магазинот што ги штити правата на потрошувачите му ја додели титулата на „најразочарувачки автомобил“ на овој скап СУВ.
Британците имаат одлична смисла за хумор, но имаат и уште подобра способност да ја согледаат реалноста. Во истражување што ги опфати искуствата на повеќе од 43.000 купувачи на нови автомобили во Велика Британија, најголемо незадоволство искажале сопствениците на Range Rover Velar. Возачите на престижниот СУВ најчесто се жалеле на проблематичната електрика, на лошата видливост наназад и на „бедната“ издржливост. Во оваа категорија се земаат оцените на сопственици на возила стари до три години.
Во оцената од магазинот што секоја година го реализира ова истражување, се наведува: „Кога ќе се плати толку скапо за модел од луксузна марка, нормално е човек да очекува дека на тој начин си обезбедува неговото возачкото секојдневие да биде поштедено од секакви вознемирувања. Но, со тоа нема да се сложат возачите на автомобили од некои марки“.
Организацијата што има за цел да ги заштити и предупреди потрошувачите од неквалитетни производи или каков било вид измама на британскиот пазар и пошироко, во објавата со резултатите од истражувањето продолжува: „Разочарувачки е тоа што Range Rover Velar заостанува како автомобил чијшто сопственици се најмалку задоволни, во конкуренција со сите останати нови автомобили во истражувањето.“
Колку што Range Rover Velar се покажува во лошо светло, толку Alfa Romeo Giulia се покажува во најдобра форма
На спротивниот крај на оваа листа, односно на врвот на задоволство на клиентите, се наоѓа марка што го носи товарот дека не произведува автомобили кои се особено издржливи. Станува збор за Alfa Romeo Giulia, којашто чини најмалку 10.000 фунти помалку од Range Rover, но затоа нејзините сопственици се најзадоволни. Тие особено ги ценат моќноста и возните својства.
Во категоријата на автомобили постари од три години, не е изненадување тоа што моделот пристига од марката Lexus, која традиционално минува одлично во анкетите од овој вид, во коишто се оценуваат издржливоста и квалитетната изработка. Конкретно станува збор за Lexus GS (2012-2018), за кого сопствениците дадоа најдобри оцени, иако моделот не се продава веќе две години. Тој во исто време е победник и во конкуренција на хибридни, како и меѓу користените автомобили.
Моделот на дното на листата е Opel Meriva (2003-2010). Сопствениците на овој модел (Vauxhall на тамошниот пазар) најмногу се жалеле за отсуството на префинетост, за слабите перформанси и дебелите столбови што ја попречуваат прегледноста.