Продолжува да се враќа автомобилскиот пазар во Европа. Во јули биле продадени 1,3 милион автомобили, што е значаен напредок во споредба со јунските 1,1 милион возила. Вкупно до јули, продажбата на европскиот пазар заостанува за 36% зад првите седум месеци лани.
Продажбата се враќа, но тоа не важи во подеднаква мера за сите производители. Концернот Volkswagen е неприкосновен на врвот, со 329.479 продадени автомобили во јули. Тоа е двојно повеќе во споредба со Peugeot SA, кој во истиот месец продал 178.753 автомобили. Разликата меѓу двата концерни е во динамиката со којашто се враќа продажбата. Додека германскиот концерн заостанува само 5 проценти зад ланскиот резултат, Французите уште имаат сериозен кусок, со -17 проценти.
Единствено Fiat Chrysler има поголем пад од Peugeot SA, со минус 20 проценти во јули. Падот реално е уште поголем, затоа што итало-американскиот концерн ја води продажбата пред ЕУ заедно со Tesla – причината за оваа необична коалиција е трговијата со CO2. Кога нултата емисија на штетни материи на возилата на американскиот производител на електрични автомобили ќе се додаде на емисијата што ја имаат возилата на Fiat и Chrysler, ЕУ добива просечна вредност на СО2 што е под нејзиниот лимит од 95 грами на километар.
Renault, BMW, Kia и Volvo се единствени што годинава во јули продале повеќе возила отколку во истиот месец лани
Меѓу поголемите производители, групацијата BMW моментно е во најдобра позиција. Баварците во јули постигнале раст во продажбата од 18 проценти во споредба со истиот месец лани. Ветува и вкупната продажба од почетокот на годината, којашто со -28% под ланскиот резултат пак е на подобар пат отколку кај повеќето конкуренти.
Сосем е спротивна ситуацијата кај СО2-сојузниците Fiat Chrysler и Tesla, кои годинава заостануват 44% зад ланскиот резултат. Во поглед на електричните возила, нивниот удел во јули достигнал 9 проценти. Volvo има најмногу возила со електрифициран погон во вкупната продажба на марката, со удел од 31 проценти. Daimler и BMW го зголемиле уделот на возила со електромотор во погонот од 11% во јуни, на 15-16 проценти во јули.
Просечната емисија на СО2 од сите автомобилски марки се смалила во јули и сега е оддалечена околу 7 грами на километар под лимитот за 2020 година.
