Во развојниот центар на Opel се симулира возен парк како во 2035 година, со голем удел на електрични автомобили. Таму ќе се истражува како да се постави мрежа од полначи што ќе биде најоптимална за користење
Развојниот центар во седиштето на Opel во Риселсхајм станува лабораторија за тестирање на електричните автомобили во реални услови. Поточно, германскиот производител на автомобили, во соработка со Универзитетот Касел и две фирми што се специјализирани за изградба на мрежа од полначи, ќе истражуваат околу најоптималното поставување на електричната мрежа во иднина – имајќи ги предвид електричните автомобили како „нови“ потрошувачи.
Истражувањето ќе трае три години, со средства од Eвропскиот фонд за регионален развој. Задача на Opel е во својот развоен центар да постави интелигентна мрежа од полначи за електрични возила. Во Риселсхајм ќе се постават над 160 станици за полнење, коишто ќе бидат користени за сопствениот возен парк од електрични возила на Opel.
Целта е со реални податоци да се направат симулации на неколку различни сценарија и сознанијата да се искористат за поставување на мрежа што најдобро ќе им служи и на корисниците и на операторите.
Четири електромобили на Opel до 2020 година и по еден модел со електрифицирана спрега во секоја моделска серија до 2024 година
Проектот е дел од планот Pace, којшто меѓу другото треба да му обезбеди водечка позиција на Opel во електромобилноста. До крајот на 2020 година, марката под знакот на молњата – колку добра симболика има во тоа! – ќе нуди четири модели со погон на струја. До 2024 година, во секоја моделска серија на марката ќе има по еден модел со електрифицирана погонска спрега.
Во центарот за тестирање во Дуденхофен исто така е присутен електричниот погон, барем посредно. Таму е инсталиран модуларен акумулатор за електрична енергија, кој е составен од стари батерии од Opel Ampera. Овие батерии имаат намален капацитет од првичниот и поради тоа не може да се користат во автомобил, но затоа се одлични како стационарен извор на струја. Целта на оваа станица во Дуденхофен е стабилизирање на напонот при прекумерно оптоварување на мрежата. Акумулаторската станица се состои од 18 батерии од Opel Ampera, со вкупен капацитет што е доволен за четиричлено домаќинство еден месец да се снабдува со електрична енергија.
Opel ја префрлува вината за дизел-аферата кај General Motors
Opel укинува три модели, воведува струја
Opel под истрага поради манипулација врз 95.000 дизели
Сите модели на Opel се префрлени на новата норма WLTP
