Каросериските лакови што ја менуваат бојата беа хит во 1990-те години. Nissan се сети на оваа стара идеја и го нуди кросоверот Juke во ограничена серија со камелеонскиот лак.
Пред повеќе децении Nissan понуди специјални ограничени серии од Primera и Micra со каросериски лак што ја менуваше бојата во зависност од аголот на гледање и од амбиенталното осветлување. Овие серии под името Aztec Mysic Green Primera и Micra светот веќе одамна ги заборави, но се чини дека Јапонците сеуште се одушевени од идејата и продолжуваат со камелеонските лакови.
Овојпат честа да го носи камелеонскиот лак со име Midnight Purple IV ја има кросоверот Juke. Секако дека и оваа серија ќе биде понудена во ограничен број на примероци. Специјалниот лак содржи црвена, портокалова, сина и виолетова боја. Сличен лак со име Midnight Purple III претходно имаше моделот R34 Skyline GT-R.
Камелеонскиот Juke ќе се понуди во серија од 300 примероци. Постои само еден проблем: Сите овие примероци ќе останат на јапонскиот пазар.
