Според првиот човек на Kia во Европа, Емилио Херера, продажбата на автомобили би можела да се врати во нормала веќе во јули. Но, за тоа да се случи, потребно е да се реализираат владините планови за поддршка на индустријата, од типот на замена на старо за ново.
Kia беше една од марките што се покажаа најмногу отпорни на корона-кризата, со најмал пад во продажбата, заедно со Toyota и Skoda. Во повеќе земји ширум Европа беа затворени салоните за автомобили. Со нивното повторно отворање во мај и со постепеното враќање на јавниот живот во нормала, се очекува и продажбата на автомобили да почне да се зголемува. Секако дека уште постои голема неизвесност, како понатаму ќе се развива ситуацијата.
Европскиот шеф на Kia има оптимистички предвидувања за растот на продажбата. Во ексклузивна изјава за познатиот британски магазин Ауто Експрес, Емилио Херера кажа: „Верувам во тоа од причина што во земјите што повторно ги отворија продажните салони, имаме слична посетеност како претходно, тоа охрабрува.“
„Не се отворени сите пазари, така што мора да почекаме и некои од големите пазари повторно да се отворат. Меѓутоа, верувам дека во јули, сите ќе бидат среќни што ќе можат да излезат од домот и ќе сакаат нов автомобил.“
За продажбата да се врати во нормала, Херера сепак посочува дека и Владите ќе мора да понудат финансиска поддршка: „Мора да бидеме сигурни, дека властите ќе ни обезбедат добар план за поддршка за индустријата, во спротивно тоа нема да се случи.“ Шефот на Kia понатаму ги наведува Германија, Шпанија и Франција, како три големи пазари што подготвуваат олеснување за купување нов автомобил, според принципот старо за ново.