На Kia й остана само уште еден сегмент да ја докаже својата способност да им се спротивстави на водечките модели, сегментот на спортските автомобили.
На салонот во Детроит што се одржува од 18-ти до 25-ти јануари ќе биде претставена студијата на спортски автомобил Kia GT4 Stinger, со која што Корејците најавуваат дека ќе се впуштат во следната битка за освојување на пазарот, во сегментот на Porsche & Co. Ако се суди по изгледот, кој вообичаено го носи потписот на дизајнерската ѕвезда Петер Шрејер, Stinger сигурно ќе им зададе болен удар на конкурентите. Но, и со техниката ќе биде исто. Погонот е назад, моторот е дволитарски со турбонатполнење и 315 КС.
Највпечатливи детали во изгледот се маската што е обрабена со бела светлечка лента и вертикално поставените диодни светла. Отворите за ладење на предните сопирачки дискови го спроведуваат воздухот кон бандажите со пречник од 20 инчи, додека под предниот браник е поставен спојлер изработен од карбон.
