Дарко Јаконов
Во следната есен ќе стартува со работа новата фабрика на BMW во Бразил. Планирано е таму да се произведуваат сериите 1 и 3, теренците X1 и X3, како и Mini Countryman.
Со вообичаеното фрлање на првата лопата, BMW денес го одбележа почетокот на изградбата на фабриката во Араквари во сојузната држава Санта Катарина. Фабриката се очекува да почне со работа во следната есен и ќе се состои од изработка на каросерии, лакирница и завршна монтажа на возила. Ова е прва фабрика на концернот BMW во Јужна Америка. BMW уште пред четири години почна со производство на мотоцикли во Бразил, а сега следуваат и автомобилите.
Вкупната инвестиција во следните години ќе достигне повеќе од 200 милиони евра. Се планира годишно да се произведуваат до 30.000 возила. Во новиот погон ќе се отворат околу 1.300 работни места. Производствената програма ќе ги опфати моделите Mini Countryman, верзијата со 5 врати од серијата 1 и лимузината од серијата 3, како и теренците X1 и X3.
