Најголемото наддавање на возила на европска почва во историјата ќе се одржува следниот викенд во организација на аукциската куќа Sotheby’s. Меѓу стотиците возила се наоѓаат и вредни колекционерски примероци, вклучувајќи го Ferrari 275 GTB од 1966 година, чијашто вредност се проценува на најмалку 2,4 милиони евра.
Аукциската куќа Sotheby’s во следниот викенд (25-ти до 27-ми ноември) ќе одржи големо наддавање во Милано. На „Duemila Ruote“ или „две илјади тркала“ ќе се најдат автомобили, мотоцикли, глисери, па дури и три историски боб-санки. Ова ќе биде досега најголемото наддавање за возила на европска почва. Истовремено се одржува и салонот за олдтајмери во Милано, што гарантира дека наддавањето нема да мине без присуство на пасионираните колекционери.
Шест двојни карбуратори за 300 КС во Ferrari 275 GTB од 1966 година
За три дена ќе се понудат над 430 автомобили, 150 мотоцикли, 60 тркачки глисери и стотици велосипеди, рекламни табли, историски сообраќајни знаци и детски играчки. Најголем интерес се очекува за три модела на Ferrari, од вкупно 45 што ќе се понудат на наддавањето. Ferrari 275 GTB од 1966 година, со шест двојни карбуратори Weber, 300 КС и алуминиумска каросерија е проценет меѓу 2,4 и 2,8 милиони евра.
Следен е Ferrari 365 GTB/4 Daytona Berlinetta од 1969 година, со 4,4-литарски дванаесетцилиндарец со 352 КС –цилиндрите располагаат со зафатнина од 365 сантиметри кубни, па оттаму и ознаката. Неговата вредност се цени меѓу 650.000 и 800.000 евра. Третиот најскап модел на Ferrari на наддавањето е F 40 од 1992, со проценета вредност меѓу 725.000 и 825.000 евра. Овој цивилен болид своевремено постави врвни стандарди, со 478 КС, 344 km/h и спринт до сто за 4,1 секунди.
Се продава еден од 50-те произведени примероци од Maserati MC 12
Во Милано ќе се најдат и 32 модела на Alfa Romeo, Lancia (29), Maserati (22) и четири модели од Lamborghini. За ексклузивност ќе се погрижи Maserati MC 12 од 2004 година, со мотор од Ferrari Enzo, но скусен за 27 КС, што значи со моќност од 632 КС. Само 50 примероци се произведени од овој модел. Проценета вредност: Меѓу 1,1 и 1,3 милион евра.
Голем е бројот на модели од германски и британски марки: Porsche (72 возила, од кои шеесет се Porsche 911), Jaguar (65), Mercedes-Benz (17), BMW (10 автомобили и 22 мотоцикли). Ѕвезда е 18 години стар Porsche 959, своевремено најбрзиот сериски автомобил во светот. Шестцилиндарскиот боксер од 2,85 литри со регистерско турбонатполнење ослободува 450 КС. Вредноста е проценета меѓу 600.000 и 700.000 евра.
Останатите модели на наддавањето во Милано:
- Mercedes-Benz 280 SL од 1968 година (меѓу 55 000 и 65 000 евра)
- Мотоцикл BMW R 75 со приколка со погон, од 1944 година, не е во оригинална состојба (меѓу 11.000 и 13.000 евра)
- Jaguar E-Type S 1 3.8 FHC од 1962 година (100.000 евра)
- Детски автомобил Jaguar D-Type, со вистински мотор (меѓу 10.000 и 15.000 евра)
[FAG id=26362]
