Теренецот на база на Toyota Hilux останува само за Азија

Пикапот Hilux е синоним за издржливост и робусност. Toyota го разви теренецот Fortuner на база на овој пикап во 2005 година и го понуди како поевтина алтернатива. Втората генерација на Fortuner и натаму останува резервирана за азиските пазари.

На симултана промоција во Банкок и Сиднеј, Toyota ја претстави втората генерација на големиот спортски теренец со седум седишта Fortuner. Конструиран врз основа на пикапот Hilux, спортскиот теренец комбинира робусност и одлични возни својства на терен. Во втората генерација, Fortuner настапува со повпечатлив дизајн, подобрени перформанси, нови практични решенија и повисоко ниво на комфор и безбедност. Според Toyota, како резултат произлегува уникатен спортски теренец кој во исто време е комфорен за развезување на децата до училиште, но е способен и да ги совладува најтешките терени.

Новите дизели се одликуваат со рекордна ефикасност од 44 проценти

Под хаубата на втората генерација на Fortuner работат новите дизели на Toyota, со подобрени перформанси и ефикасност, како и со намалена бучава. Новите мотори од семејството GD се одликуваат со намалена тежина, висока ефикасност и низок степен на триење, што резултира со ниска потрошувачка на гориво. Турбополначот со променлива геометрија на лопатките е произведен во самата Toyota и обезбедува брза реакција и висок вртежен момент во широко подрачје на вртежи. Новите мотори се достапни во две верзии, помалата со зафатнина од 2,4 литри, моќност од 150 КС и вртежен момент од 400 Nm при 1.600/min, додека поголемата верзија располага со 2,8 литри, 177 КС и вртежен момент од 450 Nm при 1.600 вртежи.

При претставувањето на првата генерација на Fortuner, Toyota ги имаше во предвид првенствено пазарите во Азија, каде што јапонскиот производител увиде потреба од достапно, но робусно семејно возило со докажани теренски способности. Уште во првата година се докажа успешноста на моделот, со 50.000 продадени примероци, за потоа продажбата да се искачи на 150.000 возила годишно. Следеше освојување на пазарите во Средниот Исток и во уште неколку региони. За прв пат, Fortuner ќе се понуди и на австралискиот пазар, каде што новиот модел ќе биде достапен кон крајот на октомври, додека продажбата во Тајланд веќе стартуваше. Цената на основниот модел на пазарот во Тајланд изнесува 1.199.000 бахти, односно околу 32.300 евра.

Технички податоци · Toyota Fortuner 2.8 GD