Дарко Јаконов
Jaguar Land Rover ќе продолжи со производство на актуелниот Defender до почетокот на идната година. Производителот уште се двоуми околу изборот на фабриката за новата генерација на моделот.
Производството на Defender веројатно ќе продолжи до крајот на јануари во фабриката на Jaguar Land Rover во Солихал, Англија. Претходно беше планирано продукцијата на теренската легенда Defender да заврши кон крајот на оваа година. Jaguar Land Rover неодамна воведе дополнителна смена на производствените ленти за да го задоволи огромниот интерес за теренецот што ги зачува главните црти во изгледот и основата на техниката кои датираат од 1948 година. Лани Jaguar Land Rover произведе 17.781 примерок од Defender, а во првата половина од годинава е забележан пораст во продажбата од близу 30 проценти, со вкупно испорачани 11.511 примероци.
Нова фабрика со капацитет за 350.000 возила ќе се гради во Полска или Словачка
Британците моментно преговараат околу локацијата за нова фабрика надвор од земјата, во насока на удвојување на продукцијата на 800.000 возила до 2020 година. Во почетокот на јули, JLR потпиша договор со австрискиот Magna Steyr за производство на модели на Британците во фабриката во близина на Грац. За кои модели станува збор, постојат само шпекулации. Покрај тоа, JLR преговара со полските и словачките власти за изградба на фабрика со капацитет од 350.000 возила до 2019 година. Синдикатите во Англија негодуваат за намерата на домашната марка да го пресели производството на Defender во странство, поради пониски производствени трошоци.
Новата генерација на Defender ќе добие нови погонски единици и современа конструкција заради исполнување на строгите норми за заштита на животната средина. Премиерата се очекува во 2018 година.
