Првиот модел од фабриката за монтажа е Volkswagen Tiguan, планирани се уште Passat, Teramont, Polo и Amarok. Тоа е петта фабрика на VW во Супсахарска Африка.
Со официјалното отворање на фабриката за монтажа во Акра, Гана, Volkswagen продолжува со зајакнување на своето присуство во супсахарскиот регион. Марката располага со уште четири фабрики на делот од африканскиот континент под Сахара: Во Јужна Африка, Кенија, Нигерија и Руанда.
Компанијата Universal Motors, увозник на Volkswagen од 2005 година, во фабриката ќе монтира до 5.000 возила годишно. Германскиот концерн учествува финансиски во новите погони за монтажа на возила во Африка. Станува збор за монтажа врз основа на SKD (Semi-Knocked-Down), односно тоа се полуготови модули, со коишто се реализира завршната монтажа на возилата. Моделите што ќе излегуваат од фабриката на Universal Motors се Tiguan, Teramont, Passat, Polo и Amarok.
Претседателот на Република Гана, Неговото Височество Адо Данква Акуфо-Адо, министерот за трговија и индустрија Алан Киерематен и останати министри од кабинетот учествуваа во свеченото пуштање на фабриката во работа. Првото возило од локална продукција е Tiguan.
Западноафриканската земја со околу 30 милиони жители го реализира планот што Volkswagen го најави уште пред две години, во присуство на германската канцеларка Ангела Меркел. Посебно со цел да се поттикне автомобилскиот сектор беше формирана агенција за автомобилски развој во Гана, со којашто се поставуваат основи за натамошно засилување на присуството на Volkswagen и останатите концерни во државата.
Volkswagen Ghana е прва автомобилска компанија што е регистрирана во Агенцијата за автомобилски развој во африканската земја. Се работи за 100% фирма ќерка на Volkswagen AG, со генерален директор Џефри Ј. Опонг Пепра.
https://www.instagram.com/p/CDb9q6GpLRh/
https://www.instagram.com/p/CCEDt6BJiKp/
