Холивудската ѕвезда Берт Рејнолдс се збогува со неговиот Pontiac Firebird Trans Am од 1977 година за половина милион долари. Автомобилот се појави во култниот филм „Смоки и бандитот“.
Берт Рејнолдс го продаде својот Pontiac Firebird Trans Am од 1977 година преку интернет платформата julienslive.com. Автомобилот произведен пред 37 години е еден од малкуте сочувани примероци од специјалната серија Bandit. Холивудската ѕвезда возеше црн Trans Am со отстранлив покрив во филмот „Смоки и бандитот“ во којшто се уништуваат возила на тони.
Под хаубата на „бандитскиот“ Trans Am работи 6,5-литарски мотор V8 со 200 КС. Покрај сертификатот со којшто се потврдува дека му припаѓал на Берт Рејнолдс, автомобилот поседува и златна плочка на прагот на возачката врата, на којашто е испишано: „Pontiac Trans Am owned by Burt Reynolds“. Првично се очекуваше продажбата да му донесе меѓу 60.000 и 80.000 долари на филсмиот бандит од автопатиштата во 1970-те години, но автомобилот на крај достигна цена од 441.589 долари. Во секој случај, тоа се добредојдени пари за филмската ѕвезда, за којашто веќе подолго време се шпекулира дека има тешки финансиски проблеми.
