Осумцилиндарецот на Ferrari ја освои титулата на светски мотор на годината

Шеесет и тројца членови на жирито, од над 30 држави, годинава го прогласија новиот V8 на Ferrari за најдобар мотор во светот.

Мотор со повеќе од четири цилиндри за последен пат ја понесе титулата на светски мотор на годината во 2008 година. Оттогаш, инженерите ги зафати бранот на смалување на работната зафатнина и ерата на турбонатполнењето. Volkswagen двапати ја освојуваше престижната титула со 1,4-литарскиот TSI, следеше екстремниот случај кога двоцилиндарецот од 0,9 литар на Fiat се најде на пиедесталот, за потоа три години по ред, титулата на најдобар мотор во светот да му припадне на трицилиндарецот од 1,0 литар на Ford. Лани уште траеше минималистичката ера, кога победи 1,5-литарскиот трицилиндарец на BMW, во хибридна спрега во спортското купе i8.

Годинава, експертите повторно им оддаваат почит на големите мотори, доделувајќи му ја титулата на светски мотор на годината на новиот осумцилиндарец на Ferrari. Со смалена работна зафатнина во споредба со претходникот и со турбонатполнење, 3,9-литарскиот V8 на Италијанците го продолжува трендот на „даунсајзинг“, но само релативно. Тука сепак станува збор за 670 КС при 8.000 вртежи и вртежен момент од 760 њутнметри при 3.000 вртежи. „Смалениот“ V8 е трет најголем победник, откако е воспоставен изборот за светски мотор на годината во 1999 година, по легендарниот 5.0 V10 на BMW и 4,4 литарскиот V8, исто така од баварската марка. Триумфот на Ferrari е втор случај во историјата на изборот, победник да биде мотор V8 – по претходно спомнатиот мотор на BMW. Во секој случај, новиот Ferrari V8 е најсилен победник во историјата на изборот.

Трет мотор во историјата со четири награди одеднаш

Италијанскиот осумцилиндарец кој дебитираше во новиот Ferrari 488, победи во дури четири категории во изборот за оваа година, вклучувајќи ја и носечката категорија: Најдобар нов мотор, најдобар мотор со високи перформанси и најдобар мотор во категоријата со работна зафатнина меѓу 3,0 и четири литри. Покрај овој мотор со фабричка ознака F154CB, досега само уште два мотора успеале во иста година да освојат три трофеи на изборот.

Традиционалистите беа скептични околу примената на турбонатполнење во мотор на Ferrari и го проследија овој чекор со остри критики, но очигледно е дека со врвен инженеринг може да се надминат негативните страни на турбонатполнењето наспроти атмосферскиот принцип и да се искористат само предностите.

По италијанскиот V8 и неговите 331 бодови од жирито следи ланскиот победник, 1,5-литарскиот трицилиндарец на BMW со 278 бодови, а по него боксерот од три литри со турбонатполнење од Porsche 911 Carrera со 267 бодови.

Победници по категории:

Под 1,0 литар:

1. Ford 1.0 EcoBoost (348 бодови)
2. Volkswagen 1.0 TSI (223)
3. BMW 0,65 l. (164)

Од 1,0 до 1,4 литар:

1. Peugeot 1,2 turbo (228)
2. BMW 1,2 (174)
3. Volkswagen 1.4 TFSI Hybrid (154)

Од 1,4 до 1,8 литар:

1. BMW 1,5 Hybrid (260)
2. BMW 1,5 turbo (152)
3. Audi 1.8 TFSI (125)

Од 1,8 до 2,0 литри:

1. Mercedes-AMG 2,0 (209)
2. Audi 2.0 TFSI (188)
3. Volvo 2,0 Hybrid (174)

Од 2,0 до 2,5 литри:

1. Audi 2.5 TFSI (307)
2. Porsche 2.5 turbo (204)
3. Ford 2,3 turbo (164)

Од 2,5 до 3,0 литри:

1. Porsche 3,0 (252)
2. BMW M 3,0 (203)
3. BMW 3,0 (178)

Од 3,0 до 4,0 литри:

1. Ferrari 3,0 V8 (395)
2. Mercedes-AMG 4.0 V8 (206)
3. Porsche 4.0 (141)

Над 4,0 литри:

1. Ferrari 6.3 V12 (227)
2. Audi 5.2 V10 (161)
3. Mercedes-AMG 5.5 V8 (124)

Најеколошки мотор:

1. Tesla electric (256)
2. BMW 1.5 Hybrid (176)
3. Volvo 2.0 Hybrid (97)

Најдобар нов мотор:

1. Ferrari 3.9 V8 (340)
2. Volvo 2.0 Hybrid (204)
3. Porsche 3.0 (174)

Најдобар мотор со високи перформанси:

1. Ferrari 3.9 V8 (311)
2. Ferrari 6.3 V12 (94)
3. Porsche 4.0 (77)

Сите досегашни носители на титулата Светски мотор на годината