Mahnart е позната адреса кога се бара тјунирање. Германските експерти за КС работат со Lamborghini и McLaren, со Audi и со BMW, а сега и со Toyota. Трилитарскиот турбо-шестцилиндарец таму добива 450 КС и 650 њутнметри.
Тјунерот Manhart од германскиот град Вупертал важи како еден од највештите специјалисти за тјунирање на BMW. Родстерот на баварците моментно ја дели техниката со една јапонска легенда, Z4 и Supra имаат исто подвозје и ист погон. Нормално дека техничарите не му одолеаја на предизвикот да го применат своето „бемвеовско“ знаење и на моторот во спортското купе на Toyota.
Преработената изведба се води како GR 450. Не е мајсторија да се погоди дека моќноста изнесува 450 КС или за 110 КС повеќе од стандардната изведба на линискиот шестцилиндарец B58 со твин-турбонатполнење. Порасна и вртежниот момент, од 500 на 650 њутнметри. Тоа е постигнато со вградување на дополнителната контролна единица MHtronik, со ремапирање на ECU и со специјален издув, задолжително со „клапна“.
Со засилувањето на моторот следи и зафат во подвозјето, за уште подинамични возни својства. GR 450 поседува спортски пружини H&R, а со доплата може да се добие и навојно подвозје KW, варијанта 3, посебно дотерано од специјалистите на Mahnart – и спуштање за 35 милиметри.
Типично за Manhart е подготвен и комплет од украсни фолии, кои внесуваат дух на мотоспорт во појавата на Supra. Главната мамка за погледите се бандажите Manhart Concave One, со двојни краци и со дијамантско полирање. Предните бандажи имаат димензија 9×20 инчи, задните 10,5 x 20 инчи. По желба, бандажите може да имаат црн сјаен или мат црн финиш. Гумите се со димензија 265/30 ZR20, односно 285/30 ZR20.
Цените:
- Ремапирање 2.899 евра
- Подвозје KW Var. 3 2.259 евра
- Декоративни налепници 999 евра
- Комплет издувен систем 2799 евра
- ECM за клапна 350 евра
- MHtronik 1999 евра
- Бандажи Concave One 2189 евра