Дарко Јаконов
Концернот Volkswagen си постави цел до 2018 година да стане најголем авто производител на светот. Малечкиот теренец Taigun е еден од моделите што ќе придонесат целта да се постигне.
Резултатите од продажбата во првите шест месеци од годинава покажуваат дека германскиот гигант може да го заземе врвот и порано од очекуваното. На првото место како најголем светски производител и натаму е Toyota со 4,9 милиони возила, по него следува General Motors со 4,85 милиони, додека Volkswagen е веднаш зад нив со 4,7 милиони возила и воедно најголем раст во продажбата. Наспроти 5,5-те проценти пораст на Volkswagen, Јапонците имаат минус од 1,2 проценти, а Американците плус од 3,9 проценти. Заостатокот постојано се намалува, само 220.000 возила го делат концернот од Волфсбург од врвот.
Во ловот на првото место ќе биде од голема помош Taigun, кој минатиот октомври беше претставен како концептно возило во Сао Пауло, во Бразил. Со овој модел Volkswagen го отвора сегментот на мини спортските теренци, каде што конкуренцијата уште го нема насетено големиот потенцијал. Овој модел нема да биде интересен само за Јужна Америка, Индија или другите пазари во раст, туку и во Европа. Браншата во последно време регистрира преоѓање на купувачите во пониските класи и сигурно е дека мини теренецот ќе привлече голем интерес.
Последните статистички податоци од продажбата на германскиот пазар, како најголем во Европа, откриваат големи промени во учеството на одделните сегменти во продажбата. Таму и натаму доминираат возилата од компакт класата со 25,1 проценти, пред малите возила (16,4%) и средната класа (12,85%). Но, додека продажбата на моделите од средната класа опаѓа за околу 14 проценти, малечките возила пораснаа за 7,2 проценти. Не е далеку денот кога последниве ќе преземат 10 проценти од пазарот.
