Дарко Јаконов
За прв пат во историјата Seat има комби во компакт класата. Како за прво, Шпанците се убедени дека Leon ST е најубав во класата, но и не се далеку од вистината.
Комбито во гамата на Leon ќе доживее премиера на салонот во Франкфурт во септември и во традицијата на куќата ќе ја носи додавката ST, покрај комби изведбите на Ibiza и Exeo. Компактот ги соединува динамичниот дизајн и спортската возливост на неговиот брат со високо ниво на практичност. На тој начин, третиот член во семејството на Leon докажува дека спортската нота и практичноста не мора да си противречат. Во стандардна конфигурација, багажникот има зафатнина од 587 литри, односно 1.470 литри со соборена клупа.
Новитет во комбито е радарскиот темпомат, кој автоматски го следи темпото на возилото напред, како и приспособливата амортизација DCC. Возните својства можат да се искачат уште едно ниво погоре со опционалниот пакет за динамика, кој покрај DCC опфаќа и прогресивно управување.
Сите мотори во гамата на Leon ST имаат турбонатполнење и директно впрскување на горивото, почнувајќи од 1,2-литарскиот бензинец со 86 КС до дволитарскиот TDI со 184 КС. Штедливоста беше една од главните развојни цели за моделот и меѓу другото таа е постигната и со лесната конструкција на каросеријата. Во најлесната изведба компактниот ST тежи 1.233 килограми, односно 45 килограми повеќе од комбилимузината – Leon ST е најлесно комби во класата.
Практичноста е неодделива од концептот на шпанското комби. Задната клупа се соборува и од багажникот, а двојниот под на багажникот обезбедува уредност и воедно го олеснува товарањето. За предмети подолги од два метри се соборува и совозачкото седиште.
Опашот на комбито е за 27 сантиметри подолг во споредба со комбилимузината и со рамното задно стакло, со меко заоблениот покрив и со мускулестите крила добива впечатлива динамична нота. При доплата за предни светла со светлечки диоди, истата технологија на осветлување се добива и за задните светла.
Понудата на мотори кај Sports Tourer е идентична со Leon и Leon SC. Моторот 1.2 TSI е достапен во верзија со моќност од 86 или 105 КС, при што посилниот мотор, во комбинација со старт-стоп и повраток на енергија при сопирање троши во просек 4,9 литри бензин на сто километри. Над тоа следуваат моторите 1.4 TSI со 122 и 140 КС, додека врвот на бензинската понуда е резервиран за Leon ST FR со 180 КС од 1,8-литарскиот TSI. Дизелите стартуваат со 90 КС во 1.6 TDI, потоа следува 2.0 TDI со 150 КС, и на врвот, изведбата FR со 184 КС.
Приспособливото подвозје има три различни модуси, кои што се избираат преку Seat Drive Profile: Спортски, комфорен и штедлив модус. Ексклузивно кај FR е достапна верзија на приспособливото подвозје во комбинација со прогресивно управување, кое од една страна го олеснува паркирањето, со помалку вртежи, а од друга страна го прави управувањето подиректно при возење по кривулести патишта.
