Дарко Јаконов
Renault во минатиот месец ја прикажа силуетата на новиот тркач за купот на марката. Сега се знае и името. Уште поважно, се дознаваат и состојките: 500 КС и карбонски монокок.
Французите в година ќе ја збогатат светската серија со нов куп на марката Renault. На овие трки ќе учествува новиот Renault Sport R.S. 01, со монокок изработен од карбон и развиен од специјалистот Dallara. За погон ќе служи мотор со 500 КС од партнерот Nissan, односно од неговата тјунерска и мотоспорт работилница Nismo. Не е тешко да се претпостави дека станува збор за V6-Biturbo од Nissan GT-R. Менувачот е секвенцијален, тркалата носат специјално дизајнирани гуми од Michelin.
На првата фотографија што Renault ја објави попладнево се гледа супернизок болид со фиксен заден спојлер и куси каросериски превиси. Тркачот нема да надмине тежина од 1.100 килограми. Останатите детали ќе бидат познати при премиерата што е најавена за 27-ми август, на салонот во Москва.
