Дарко Јаконов
Во ноември, Cayenne ќе добие братче, Macan е неговото име. Основата потекнува од Audi, но Porsche додава и неколку свои специјалитети
Малиот брат на Cayenne ќе вози со многу посилни мотори од оние што се вградуваат во донаторот на платформата, спортскиот теренец Audi Q5. На почетокот на продажбата во ноември, ќе може да се избира меѓу три мотори. Најслабиот е дизел со 245 КС, по него следуваат двата бензинци, едниот со 340, другиот со 400 КС. Сите мотори се шестцилиндарски во V и ја црпат моќта од работна зафатнина од три литри. Во 2015 година во понудата ќе се воведат послаби и поевтини моделски изведби со четирицилиндарски дизел и бензинец.
Моторите во основата потекнуваат од Audi, но дополнително се оптимирани за вградување во спортската марка. Во Audi Q5, дијапазонот на моќност се движи меѓу 143 и 313 КС. За разлика од Q5, Macan ќе се нуди само со погон на сите тркала, а преносот на сила ќе се врши преку седумстепени менувачи со двојна спојка. На списокот на дополнителна опрема ќе се наоѓаат ексклузивни ставки од типот на пневматска амортизација или врвно аудиофилско озвучување од Burmester. Цените ќе стартуваат од 47.500 евра.
