за

Peugeot 308 Concept R: Спортските гени проработеа повторно

Француската марка не ја крие одушвеноста од новиот мотор со 270 КС. По купето RCZ R, турбомоторот го задвижува и новиот компакт 308. Засега е концепт, но нема уште долго.

Паралелно со светската премиера на новата генерација на 308, Peugeot ќе ја прикаже и верзијата 308 Concept R. Возилото засега се води како концепт, но со оглед на богатата спортска традиција на марката со лавот, мошне е веројатно дека веќе во текот на следната година буквата R ќе се најде и на сериски модел.

peugeot 308 r strana

Спортските гени во новиот 308 проработуваат со спуштено подвозје, широка трага и испакнати крила, како и со бандажи со оригинален дизајн и пречник од 19 инчи. Под каросеријата изработена во дел од карбон и лакирана во две бои се крие 1,6-литарскиот турбобензинец од RCZ R, од кого инженерите на марката извлекоа 270 КС. Со специфична моќност од 170 коњски сили по литар работна зафатнина, овој мотор засега го држи рекордот во класата. За целосно искористување на овој потенцијал, на предната оска работи торсен диференцијал, а соодветно се димензионирани и сопирачките.

peugeot 308 r nazad

Покрај новиот 308 и концептот 308 R, на штандот на Peugeot во Франкфурт ќе се најдат уште редизајнираните 3008 и 5008, студијата 208 Hybrid FE и концептот 2008 Hybrid Air. Купето RCZ R, концептниот автомобил Onyx и два тркачки модела на база на 208 ќе демонстрираат дека емоциите секогаш имаат централна улога на Peugeot.

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

Напишете коментар

Вашата адреса за е-пошта нема да биде објавена. Задолжителните полиња се означени со *

Електричниот Golf чини 28 денари за 100 километри

Производител против држава: Mercedes победи во спорот со Франција