Работничкиот совет на Opel се побуни за пензиската реформа што сопственикот Peugeot ја планира со цел да ги скуси трошоците во корона-кризата.
Расте незадоволството поради планираното скусување на пензијата за вработените во Opel. Персоналот на германската марка што веќе трета година се наоѓа во сопственост на францускиот PSA е незадоволен од плановите што беа соопштени кон крајот на минатата недела. Синдикатот реагира дека со „масовното отпуштање работници и отсуството на перспективи за иднината во голем број од подрачјата на делување на компанијата, продолжува да слабее врската со Opel.“
Opel во минатиот петок им соопшти на вработените дека компанијата бара итни преговори со работичниот совет заради „темелна модернизација“ на пензиското осигурување. Пензискиот систем целосно и независно е организиран во рамките на компанијата. Оттаму образложуваат дека фондот „со децении наназад бил далеку над пазарниот стандард“ и дека истиот сега претставува „значаен трошок“.
Околу 15.000 вработени во Opel се погодени од пензиската реформа
Скусувањето на пензијата ќе зафати околу 15.000 вработени во Opel во Германија. Од работничкиот совет возвраќаат дека „најголемиот дел од финансирањето на пензиското осигурување на Opel“ го подмирувал концернот General Motors, под чијшто покрив беше германската марка до преземањето од францускиот PSA. Синдикатот дополнува и дека трошоците веќе се смалени значително со масовното отпуштање вработени во минатите години.