Една од најголемите автомобилски онлајн–берзи во Европа доби нов сопственик. Компанијата во чијашто сопственост премина познатиот mobile.de е со седиште во Норвешка и го носи името Adevinta.
Станува збор за компанија што исто така се бави со онлајн-трговија. Берзата mobile.de, заедно со сите останати автомобилски портали во повеќе држави во Европа, претставува дел од Ebay Classifieds, кој всушност беше цел на купувањето на Норвежаните. Зделката вредеше 9,2 милијарди долари.
На Ebay ќе му бидат исплатени 2,5 милијарди евра во готовина. Со 44 проценти удел во акциите и 33 проценти удел во правата на глас, Ebay станува најголем акционер во Adevinta. Преку ова преземање, норвешката компанија станува „најголема компанија со онлајн-огласи во светски рамки“, како што посочува шефот Ролв Ерик Рисдал. Комшпанијата очекува големи синергиски ефекти и намалување на трошоците на тој начин.
Подолго време се зборуваше дека продажбата на берзата за возила ќе се случи веќе во текот на летово. Според гласините, германскиот медиумски концерн Аксел Шрингер исто така бил заинтересиран за Ebay. Трансакцијата ќе биде комплетирана во првиот квартал од следната година.
