Дарко Јаконов
Mercedes-AMG има нов основен модел и тој располага со „само“ 306 КС. Станува збор за нова верзија позиционирана под идниот A 45, со дволитарски турбо бензинец, со погон на сите тркала и со гени на AMG
Mercedes-AMG го шири кругот за нови купувачи, со нов најдостапен модел на местото на A 45 од претходната генерација. Моделот со нов дволитарец со турбонатполнење, со 306 КС и 400 њутнметри, доаѓа во комбинација со 7-степен Speedshift DCT со двојна спојка, со спортско подвозје и со варијабилен погон на сите тркала AMG Performance 4MATIC. Цената на Mercedes-AMG A 35 4Matic во Германија изнесува 47.529 евра.
Вообичаено при стартот на новите модели, паралелно се нуди и специјална верзија Edition 1, со екстра опрема и екстра стилски детали, но и соодветна доплата. Оваа серија ќе биде достапна во следните 18 месеци и чини 55.365 евра. Испораките за двете варијанти стартуваат во декември.
Возачот во Mercedes-AMG A35 4Matic има на располагање пет програми за подвозјето и погонската спрега
Спринтот до темпо сто трае 4,7 секунди, крајната брзина е ограничена на 250 km/h. Погонот 4Matic во нормални услови ги испорачува њутнметрите само до предната оска, а во исклучителни случаи испорачува во сооднос 50:50 меѓу двете оски. На возачот му стојат на располагање и пет програми на работа на погонската спрега и подвозјето, почнувајќи од комфорна, до програма за тркачка патека.
Надворешноста се разликува од стандардната A-Class по лајсните во отворите за воздух во предниот браник, по препознатливата маска на AMG, сплитерот и украсните детали во сребро-хром комбинација. Со доплата се вградуваат бандажи од 19 инчи и повпечатливи странични прагови во стилот на AMG. Во кокпитот секако дека доминира мултимедискиот систем MBUX, со неколку начини на прикажување на информациите. Еден од нив е „Supersport“, со тркалезен бројач на вртежи во средина и со тридимензионален приказ на возните вредности на огромниот двоен дисплеј.
Новитет е средишната конзола во стил на AMG, со дополнителни прекинувачи за ЕЅР, за мануелниот модус на менувачот и за приспособливата амортизација.
Уште останува неизвесност околу наследникот на A45, но не околу неговото појавување, туку околу екстремот што тој ќе го постигне. Се шпекулира и за верзија А50.
AMG изведбата од Mercedes A-Class ќе вози со над 450 КС
Лимузинскиот Mercedes A-Class пристига во почетокот на 2019
