Дарко Јаконов
Продажбата на доставни возила е во раст и тоа се огледува и во одлуката на Mercedes да ги прошири своите производствени капацитети во Шпанија. Дополнително се воведува и трета смена за Vito и V-Class.
Mercedes ги проширува производствените капацитети за доставниот Vito и неговиот луксузен брат V-Class во фабриката во Виторија, Шпанија. Пазарот на доставни возила бележи значаен пораст во последниве години и Mercedes сега реагира соодветно на зголемената побарувачка. Инвестицијата во главната производствена локација на глобално ниво за вановите од средната класа за оваа година ќе се искачи на 41 милион евра, наспроти ланските 14 милиони евра. Најголемиот дел од инвестицијата оди во проширување на каросериското одделение, лакирницата и монтажата. По овие модификации, во октомври ќе биде воведена и трета работна смена во фабриката во Виторија.
Mercedes во првиот квартал од годинава продаде 76.600 транспортери, што е за една петина повеќе во споредба со истиот период лани. Најголем раст постигнуваат токму Vito и луксузната V-Class, со којашто постепено се врзува прекарот „S-Class меѓу транспортерите“. Продажбата на Vito во првото тромесечје се зголеми за 61 проценти, на 21.300 примероци, додека ванот V-Class достигна 9.300 примероци или 58 проценти повеќе отколку во истиот период лани.
