Младите бизнисменки се водечка сила во енормното зголемување на продажбата на престижната италијанска марка во Кина. Околу 40 проценти од сопствениците се дами.
Шефот на Maserati, Харалд Вестер, го објаснува големиот раст во продажбата на марката во Кина: „Четириесет проценти од нашите клиенти во Кина се успешни млади бизнисменки кои ги ценат европските производи и сакаат шофер да ги вози во нивниот нов Quattroporte.“ За споредба, жените учествуваат со само 5 проценти во продажбата на Maserati во Европа и САД.
Во првите девет месеци од годинава, престижната марка во сопственост на Fiat прими околу 23.000 нарачки во светот. Тоа е огромен раст во споредба со 6.288 возила продадени лани. Најбаран модел е знаменосецот Quattroporte, на кого отпаѓа околу половина од продажбата. Само во Кина се продадоа 4.000 примероци од моделот, па оттаму и не чуди што земјата е најголем пазар за Quattroporte во светот.
Цената на врвната изведба на спортската лимузина во Европа изнесува 150.000 евра, но во кина оваа сума расте на 325.000 евра со давачките за царина и акцизата. Основниот модел со шестцилиндарски мотор, пак, чини 205.000 евра, место 110.000 евра во Европа. Купувачите во Кина се значително помлади од другите земји. Просечната возраст на сопствениците во Кина изнесува 37 години, наспроти 55 години во САД и Европа.