Со 160 автомобили продадени лани и раст од 48%, Швајцарија е меѓу десетте најважни пазари за Lamborghini во светот.
Lamborghini отсега е присутен со пет салони во Швајцарија. Посебно во члест на отворањето на новиот салон во Цирих се одржа и локална премиера на Huracan Evo, кој во март првпат се појави пред јавноста на салонот во Женева.
Швајцарија е во Топ 10 пазари за Lamborghini во светот, гледано според продажбите. Но, алпската земја има и дополнително значење поради тоа што во неа живеат голем број љубители на автомобилите од врвната лига (читај мултимилијардери), така што потенцијалот за привлекување нови купувачи е огромен.
Со Lamborghini Zürich раководи Hirsch AG, за којашто ова е втор салон на италијанската марка, откако лани отвори салон во Сент Гален. Лоциран во Клотен, во северниот дел од Цирих, салонот од 1.000 метри квадратни е изведен со новиот корпоративен дизајн на марката. Посебно внимание е посветено на просторот кадешто се договараат изработките на возила по посебна нарачка.
Лани на швајцарскиот пазар беа испорачани 160 возила (+48%), а за годинава се очекува продажбата да постигне уште поголем раст, затоа што 2019 ќе биде прва полна година за супер-СУВ моделот Urus.