На последниот салон во Франкфурт беше студија, а на претстојниот женевски салон веќе се појавува како сериски автомобил. Citroen Cactus верно го толкува визионерскиот дух на француската марка.
Футуристички дизајнираниот кросовер Citroen Cactus ќе доживее премиера како сериски автомобил на салонот во Женева во почетокот на следниот месец. Една од иновациите е вградувањето на воздушната перница за совозачот во таванот, со што се ослободува простор за повеќе прегради во кокпитот. Класичните инструменти се заменети со дигитален дисплеј, а прекинувачите за ракување исто така се заменети со дисплеј преку кого се пристапува до сите функции на возилото.
Делови од каросеријата се обложени со таканаречени „airbumps“ кои што се достапни во повеќе бои и го заштитуваат возилото. Овие панели се состојат од воздушни капсули и ги амортизираат контактите со други возила, воедно намалувајќи ги и трошоците за поправка.
Возилото со должина од 4,16 метри има меѓуоскино растојание од 2,6 метри и околу 200 килограми е полесно од компактот C4. Багажникот на кросоверот нуди простор од 358 литри. Панорамскиот стаклен покрив и носачите за багаж на покривот се во стандардната опрема на Cactus.
Citroen наведува потрошувачка од 3,1 литри за дизелската верзија на моделот и емисија од 82 грами СО2 на километар. Бензинецот исто така има емисија под 100 грами, што му носи на моделот одредени повластици при регистрирање во земјите во ЕУ.
