Луксузната американска марка пронајде начин да ја поттикне продажбата на домашниот пазар – заинтересирани купувачи добиваат по сто долари за тест. Cadillac сепак е во добивка на крајот.
Во обид да ја поттикне продажбата на возила и да привлече нови купувачи, Cadillac им плаќа по 100 долари на заинтересираните купувачи за пробно возење на луксузните модели. Кампањата започна во март во сите дилерства на марката во САД и ќе заврши на крајот на април.
Пробното возење можат да го направат сите возачи на возраст над 21 година, со важечка возачка дозвола, осигурување, под единствен услов да поседуваат возило поново од 2004 година, коешто не е од марките на General Motors. Доколку возачите се решат да купат возило по пробата, Cadillac ќе им одобри попуст во висина од 1.500 долари.
Луксузната марка на General Motors бара начин да ја зголеми продажбата, откако во март беше забележан минус од 6,3 проценти. Во минатата година Cadillac постигна зголемување на продажбата од 22 проценти, но трендот не се задржа во првиот квартал од годинава. Марката е во офанзива и на европскиот пазар, каде што се обидува со моделите ATS и CTS да се етаблира против премиум конкурентите Mercedes и Audi.
Што се однесува до стоте долари како награда за тест возачите, тоа е премала сума за рекламата што ја прават возилата додека циркулираат по улиците. Многу повеќе народ ги забележува возилата на улица пред себе, отколку на билбордите или во медиумските реклами. Cadillac практично ги најмува возачите да рекламираат за него.