Порастот од пет проценти во продажбата на BMW во минатиот месец беше недоволен да се достигне темпото на Mercedes. Мошне е извесно дека марката со ѕвездата ќе се врати на тронот.
Баварците во минатиот месец постигнаа за 5,6 проценти повеќе продажби во споредба со ланскиот мај, со 168.129 возила од сите марки во групацијата. Тоа не дава причина за славење во Минхен, затоа што конкурентот Mercedes во исто време продаде далеку повеќе возила отколку BMW. Мајската продажба на сино-белата марка се должи на зголемениот интерес за серијата 7, како и на вообичаено солидната продажба на спортските теренци.
Наспроти тоа, Mercedes во мај постигна двојно поголем раст во продажбата, од дури 13 проценти, што и кај швабската марка произлегува од растечката побарувачка за спортски теренци. Притоа, обете марки профитираат од кинескиот пазар, кадешто BMW има раст од 7,5 проценти и 37.487 продажби, додека Mercedes контрира со раст од спектакуларни 39 проценти и 38.271 продадени возила.
Силен притисок врз BMW пристига и од Audi
Третиот член во германската премиум тројка, лани за првпат имаше послаба продажба од Mercedes по 2010 година, но и тој годинава се враќа во форма. Мајската продажба за Audi донесе раст од 6,7 проценти или 164.150 возила. Плусот на кинескиот пазар изнесува 5,5 проценти, со вкупно 50.002 продадени возила.
До крајот на годинава, BMW ќе се соочи со огромен предизвик да ја задржи првата позиција во продажбата во премиум сегментот, којашто ја држи уште од 2005 година. Конкуренцијата од Штутгарт и Инголштат врши силен притисок, постојано лансирајќи нови и атрактивни модели, додека BMW и натаму се наоѓа во стагнација, без излез на повидок.
Mercedes со над 20.000 продажби повеќе од BMW
Во првите мет месеци од годинава, Mercedes продаде вкупно 818.175 возила, што е за над 20.000 повеќе од BMW. Марката со четирите прстени исто така е во силен пробив на пазарот и со погодена моделска стратегија успеа во периодот од јануари до мај да продаде 784.280 возила, за моментно да заостанува со само 13.000 возила зад Баварците.
