Дарко Јаконов
За претстојниот салон во Лос Анџелес е најавена премиерата на специјалната серија од суперспортското купе на Audi со 570 КС и каросерија олеснета со карбонски елементи.
Американската филијала на Audi го најави дебито на специјалната серија R8 competition на претстојниот салон во Лос Анџелес. R8 competition е најсилната верзија на суперспортското купе, a воедно и најблиска до натпреварувачките болиди на Audi, конкретно до R8 LMS којшто победи буквално на сите трки кадешто се појави. Серијата од 60 примероци е наменета само за пазарот во САД и поседува 5,2-литарски V10 со 570 КС, во ексклузивна комбинација со седумстепен менувач S tronic и спортски издув. Во ова издание, R8 забрзува до 60 mph, односно 96 km/h за само 3,2 секунди и постигнува 320 километри на час, што го прави најбрз досега произведен примерок од моделот. Атмосферскиот мотор V10 FSI е ист како во Audi R8 LMS, којшто победи на 24-часовните маратонски трки во Дајтона и Нирбургринг.
Следната ексклузивност на „competition“ е примената на карбон за задниот спојлер и капакот на моторот, ретровизорите, страничните панели, предниот спојлер и задниот дифузор. Со примената на карбонот значително се смалува тежината на возилото, дополнително со ефектот на спуштање на тежиштето, што на крајот влијае и врз перформансите и врз возните својства на R8 competition. Во пакет доаѓаат и бандажи во црна сјајна боја со гуми 305, керамички сопирачки и црвени сопирачки клешти, за контраст со сивите карбонски елементи.
Во внатрешноста исто така се користи карбонот, на пример за средишната конзола и за осветлените прагови на вратите, со испишано „competition“. Како дел од ексклузивната серија на модели на Audi, купувачите ќе имаат можност да избираат бои што се недостапни за „стандардните“ верзии на R8. Вкупно 60 примероци ќе се изработат во фабриката во Некарсулм почнувајќи во ноември, а испораките ќе следуваат во почетокот на следната година.
