Дарко Јаконов
Во својата 110-годишна историја, матичната фабрика на Skoda во Млада Болескав денес го произведе 12-милионитиот автомобил. Модел што оттука излегол во најголем број примероци е серијата 105/120/130 од 1976 година.
Чешката автомобилска фабрика прославува јубилеј. Во матичната фабрика на Skoda во Млада Болеслав, од 1905 година досега се произведоа 12 милиони возила. Од овие погони денес излегуваат шест модели: Octavia, Octavia Combi, Fabia, Fabia Combi, Rapid и Rapid Spaceback. Само во последните пет години, во фабриката се инвестирани 1,5 милијарда евра. Во моментов се гради нов погон за изработка на каросерии и до почетокот на 2017 година ќе се инвестираат уште 86 милиони евра.
Во фабриката во Млада Болеслав бие срцето на Skoda
Над половината од сите досега произведени автомобили со знакот на Skoda се излезени од оваа фабрика. Огромен поттик пристигна во 1991 година, откако концернот Volkswagen ја презеде марката под свој покрив. Оттогаш се произведени 7,8 милиони возила, од кои 3,3 милиони примероци од сите генерации на Fabia и 2,8 милиони примероци од Octavia. Млада Болеслав има капацитет дневно да произведува до 1.200 возила.
Улицата Вацлав Клемент отсекогаш била „домашната“ адреса на Skoda. Татковците на марката, Лорин и Клемент, тука имаат почнато со производство прво на велосипеди во 1985 година, потоа на мотоцикли, а од 1905 година и на автомобили. Во фабриката со петнаесет илјади вработени се произведуваат и бензински мотори и менувачи.
Skoda има уште две фабрики во Чешка. Во Квасини се произведуваат Superb, Superb Combi и Yeti, а од Врхлаби излегуваат менувачи со двојна спојка од генерацијата DQ200 за сите марки од концернот. Надвор од земјата, Skoda произведува уште во Кина, Русија и Индија.
Најзначајните модели произведени во Млада Болеслав
– 1906-1909: Laurin & Klement Typ B/B2/BS – 300 примероци
– 1916-1925: Laurin & Klement Typ 200/205/210 – 1.200 примероци
– 1922-1929: Laurin & Klement Typ 100/105/110/115/120/125/150 – 5.800 примероци
– 1933-1947: SKODA Popular/Standard/Rapid/Favorit/911 – 26.600
примероци
– 1946-1952: SKODA 1101/1102 – 52.500 примероци
– 1959-1964: SKODA Octavia/Combi – 313.700 примероци
– 1969-1976: SKODA 100/110 – 1.079.800 примероци
– 1976-1989: SKODA 105/120/130 – 1.830.300 примероци
– 1988-1994: SKODA Favorit/Forman – 848.800 примероци
– 1994-2000: SKODA Felicia/Felicia Combi – 850.000 примероци
– 1996-2004: SKODA Octavia I – 838.000 примероци
– 2004-2013: SKODA Octavia II – 1.334.100 примероци
– 2012-10/2015: SKODA Octavia III – 633.600 примероци
– 1999-2008: SKODA Fabia I – 1.736.600 примероци
– 2006-2014: SKODA Fabia II – 1.384.400 примероци
– 2014-10/2015: SKODA Fabia III – 166.100 примероци
– 2012-10/2015: SKODA Rapid/Rapid Spaceback – 309.000 примероци
