Баварците се подготвуваат за новото одмерување на силите со класата Е на Mercedes. Изгледот ја следи вообичаената шема на BMW, револуцијата ќе биде во трицилиндарските мотори под хаубата.
Како што откриваат првите рендери, во идната генерација на серијата 5 не се очекуваат драстични промени во изгледот. Моделот од вишата средна класа ќе го задржи препознатливиот изглед на BMW, со промени само во одредени детали со кои што ќе се постигне помодерен и престижен лик и ќе се додаде поголема спортска нота во споредба со актуелниот модел. Купувачите во премиум сегментот обично не ги ценат радикалните промени во стилот.
Клучен момент во моделите од серијата 5 отсекогаш била врвната управливост и инженерите на BMW ќе се посветат во натамошно усовршување на новата лесна платформа, на која што ќе се базираат сите модели во дијапазонот од серијата 3 до серијата 7. Со пообемна примена на челик со висока цврстина, алуминиум и карбон се очекува идната лимузина да смали околу 100 килограми во тежината. Новите лесни материјали, освен за подобрување на возливоста ќе придонесат и за натамошно зголемување на цврстината на каросеријата.
Под хаубата ќе работат погонски единици од модуларната гама на BMW, со единствена големина на цилиндрите од 500 сантиметри кубни и постигнување на потребната зафатнина само преку бројот на цилиндрите. Понудата ќе почнува со трицилиндарските бензински и дизелски мотори со зафатнина од 1,5 литар и турбонатполнење, што веќе се вградуваат во новиот Mini – тоа може да биде тежок залак за традиционалистите на марката.
Најмалечките дизели ќе имаат емисија на СО2 под 100 g/km, а за прв пат во серијата 5 ќе се вградува и хибриден погон. Дел од погонската спрега во хибридната „петка“ ќе потекнуваат од спортскиот BMW i8, кој комбинира 1,5-литарски бензинец и електромотор. За врвната моделска изведба М5 ќе се користи оптимираниот V8 од 4,4 литри.
Големо внимание во развојот се посветува и во мобилното поврзување, како и во системите за полусамостојно управување. Новата серија 5 ќе биде стандардно опремена со пристап на интернет и СИМ-картичка за користење на мобилни апликации, како музички стриминг и пребарување на Гугл, како и за далечинско вклучување на климатизацијата во кабината преку мобилен телефон.
Продажбата ќе стартува со лимузината, на лето во 2016. Потоа ќе следува серијата 6, вообичаено како купе верзија врз база на серијата 5, со 4,4-литарскиот V8 со двојно турбонатполнење од моделот М5.
Комбито од класата Е на Mercedes отсекогаш ја предводело трката во зафатнината на товарниот простор, па може да се очекува дека новиот Touring од серијата 5 ќе се обиде да го надомести овој заостаток. Со доплата ќе се нуди пневматска амортизација, заради поголем комфор при возење под полно оптоварување.
Актуелната изведба Gran Turismo не го постигна очекуваниот успех, но флексибилноста на новата платформа ќе овозможи да се зголемат меѓуоскиното растојание и ширината на трагата, за создавање на полуксузна изведба во серијата 5.
